Abstenimi, tregues rënieje për aleancën Rama-Meta

Lajmi i parë që na vjen nga votimet e së dielës është përqindja më e ulët e pjesëmarrjes në zgjedhje krahasuar me vitin 2013. Shifrat paraprake flasin për një diferencë prej 6-7 përqind ose rreth 200 mijë votues më pak se dy vjet më parë. Nëse kjo shifër konfirmohet abstenimi fiton një vlerë që duhet përllogatitur më së shumti nga mazhoranca, e cila ka dhe pjesën më të madhe të kësaj firoje nisur nga raporti i besimit që kjo e fundit fitoi në zgjedhjet parlamentare të vitit 2013 përballë koalicionit të djathtë. Nëse kjo masë zgjedhore do të valorizohej në favor të opozitës, atëherë peshorja e rezultatit do të vinte në diskutim avantazhin e fituar nga e majta në zgjedhjet e kaluara. Ajo që mund të quhet fasha gri e elektoratit dhe që nuk është e lidhur drejtëpërdrejtë me interesat e politikës dhe militantizmit partiak ka refuzuar Aleancën për Shqipërinë Europiane dhe nuk ka dhënë pëlqimin as për opozitën e vendit. Në këtë abstenim domethenës, janë dy shifra që e bëjnë edhe më të rëndësishëm refuzimin ndaj politikës që drejton vendin: përqindja e votuesve në Vlorë, ku deputet i zonës është kryeministri i vendit dhe pjesëmarrja e ulët e votuesve në Korçë nga ku vjen zv/kryeministri ose numri dy i qeverisë Niko Peleshi. Vlora ka përqindjen më të ulët në historikun e zgjedhjeve me një shifër që nuk i kalon 37 për qind në rang qarku, ndërsa në Korçë pjesëmarrja në zgjedhjet vendore është 21 për qind për qytetin. Dy zona këto ku vëmendja e qeverisë ka qenë maksimale dhe ku kanë marrë jetë projekte urbane që mazhoranca i ka si shembull të transformimit të Shqipërisë Europiane, si projekti i Lungomares dhe sheshi me kullën e Korçës. Por duket se dhuratat e kryeministrit për këto dy qytete nuk kanë mjaftuar për t'i dhënë një votë aforfe qeverisë së zotit Rama. Kryeministri ka thënë shpesh se ata që nuk votojnë nuk kanë të drejtë të ankohen për qeverinë dhe qeverisjen. Por nuk mund të jetë zoti Rama që mund përjashtojë të drejtën e qytetarëve për ta refuzuar atë me votë. Si kryeministër apo kryetar i Partisë Socialiste Edi Rama mund të legjitimojë ndryshimin e statutit të partisë apo zëvendësojë bashkëpunëtorët e tij, por nuk komandon dot abstenimin ndaj aftësive dhe talentit të tij politik.
l.mitro