Auditi në dogana pas dorëheqjes enigmatike të Spiropalit. Ministria e Financave: Shifrat nuk janë shqetësuese

Pas dorëheqjes enigmatike të Elisa Spiropalit nga Drejtoria e Përgjithshme e Doganave, drejtoresha e komanduar që mban dhe postin e zv/ministres së Financave, Irena Beqiraj mësohet se ka urdhëruar një auditim të brendshëm që ka prekur periudhën kur doganat drejtoheshin nga paraardhësja e saj. Këshilltari për mediat në Ministrinë e Financave, Bardhi Sejdarasi tha për ResPublica se auditimi i kryer është një veprimtari rutinë që kryhet çdo ditë nga institucionet në varësi të kësaj ministrie dhe se nuk ka dijeni për një hetim të brendshëm që lidhet me punën e Spiropalit në Drejtorinë e Doganave.

Elisa Spiropali u përfol në media për miliarda lekë përfitime korruptive gjatë ushtrimit të detyrës si Drejtoreshë e Përgjithshme në në dogana, çka dyshohet se ka qenë edhe arsyeja pse ajo u largua nga ky post. Gjithsesi Ministria e Financave tha për ResPublica se nga auditimi nuk kanë rezultuar shifra shqetësuese dhe se çdo akuzë që i bëhet Spiropalit është në kuadër të sulmeve personale ndaj saj.

Largimin e saj nga ky post kryeministri Rama e justifikoi me pamundësinë e Spiropalit për të drejtuar këtë institucion në kushtet e shtatzanisë, por ndonëse nënë e re, gjithsesi Spiropali nuk e ka ulur ritmin e aktivitetit politik. Ajo merr pjesë aktive në fushatën e Partisë Socialiste për Tiranën në mbështetje të kandidatit Erion Veliaj, me të cilin kanë drejtuar bashkë lëvizjen “Mjaft”

l.m