Pritmëritë e opozitës për zgjedhjet, Berisha nuk flet për fitore, por për “një kthesë shumë të përfillshme dhe shumë të rëndësishme...”

Partia Demokratike duket se po luan më tepër me forcën e pakënaqësisë ndaj qeverisë, sesa me një projekt të vërtetë në këto zgjedhje. Ndonëse kryetari Lulzim Basha, flet për një uragan më 21 qershor dhe artikulon premtime që lidhen direkt me kostot e jetesës, ngjan e vështirë një përmbysje, apo një kthesë e vërtetë. Më tepër sesa ndryshimi i rezultatit, është lëvizja e marzhit të votave, ajo që do të përkufizojë aksionin politik të opozitës pas zgjedhjeve. Dhe këtë e ka bërë më të qartë, ish-kryeministri Sali Berisha, në intervistën e fundit dhënë për “Ora-News”. “Zoti Berisha i druheni një milionë shuplakave të 2013....

-Ta shohim më 21, unë nuk i druhem. Unë jam i bindur se kthesa do jetë shumë e përfillshme dhe shumë e rëndësishme. Kam bindje të madhe, ndonëse po bëjnë gjithçka për të blerë vota...”, tha Berisha. Më tej akoma, Berisha qarkullon sot përmes Facebook, një sondazh të agjencisë NOA, që nxjerr fitues Halim Kosovën në Tiranë. Thënë kjo, duket se PD-ja po mendon të arrijë ndonjë fitore “pikante” sa për t’i lejuar rigjallërimin e aksionit politik, i cili vuan sot nga organizimi më tepër sesa nga temat dhe çështjet. Këtu meriton vëmendje një fakt: në dy vjet e gjysmë PD-ja ka hequr dorë nga shumë instrumente opozitarizmi. Një është edhe komisioni hetimor, interpelancat, duke e lënë të qetë qeverinë, me të cilën është marrë thjesht me sherre parlamentare.

s.z