A duhet çliruar edhe Ben Blushi nga "barra e kontratës me PS"?

Me fjalimin për “Funeralin e Rilindjes” Ben Blushi parashkroi distancimin nga ekipi i socialistëve që mbështesin Edi Ramën në programin e rimëkëmbjës së vendit përmes asaj që rëndom artikulohet si Rilindje Shqiptare. Blushi nuk I kurseu kritikat e mprehta për qeverinë dhe përfaqësuesit e saj, shumë prej të cilave në rrjeshta i adresoheshin njëshit të Partisë Socialiste dhe rrethit që ai ka rrotull vetes. Edhe pse nuk atakaoi emra konkretë drejtorësh apo ministrash siç bëri Tom Doshi në deklarimet e tij publike, kritikat e Blushit ishin një goditje edhe më e fortë për Edi Ramën dhe kastën e re të pushtetit socialist. Kjo jo vetëm sepse kritikat vijnë nga një anëtar i kryesisë dhe eksponent me peshë në Partinë Socialiste, por edhe sepse në thelb pakënaqësia e Blushit nuk duket të jetë personale si në rastin e Tom Doshit, por një qëndrim politik që lidhet me filozofinë më të cilën Edi Rama po qeveris vendin. Kur Tom Doshi doli publikisht me akuzat se qeveria po punon keq dhe se drejtorët e emëruar prej saj janë mbërthyer nga arroganca, Edi Rama tha se Tom Doshi duhej çliruar nga barra e kontratës me Partinë Socialiste dhe kjo u shoqërua me përjashtimin e tij nga grupi parlamentar. “Shpullat” e Blushit janë akoma dhe më të forta për qeverinë dhe rracën e re të socialistëve që drejtohet nga Edi Rama, sesa shatntazhi i Tomës. Pyetja që shtrohet është se a duhet aplikuar i njëjti standard  që u ndoq me Tom Doshin, i cili u bë viktimë e rregullave të partisë dhe ndëshkimit shembullor nga kryetari? Fakt është se deri më tani as kryesia dhe as grupi parlamentar i Partisë Socialiste  nuk janë mbledhur për të diskutuar mbi qëndrimet e shfaqura publikisht nga Bushi që rëndojnë mbi  mazhorancën. Madje shumë deputetë nuk guxuan as t’i komentojnë deklaratat e tij kur u pyetën nga mediat. Edhe Rama ngjan të mos jetë  aq i shqetësuar me rebelimin e Blushit sa në rastin Doshi, të cilit i tregoi derën në emër të ruajtjes së kohezionit në familjen socialiste. Me qëndrimin që kryetari i PS po mban ndaj kritikave të deputetit të Korçës po lë të nënkuptohet se për Blushin po aplikon një tjetër standard. Një përjashtim eventual i Ben Blushit mund të ishte me pasoja për PS-në dhe Edi Rama ndoshta I druhet një shkizme të tillë.  Megjithatë standardet duket se nuk bëjnë pjesë në rregullat e lojës Brenda Partisë Socialiste kur vetë Edi Rama si kryetar i forcës politike që drejton nuk i nënshtrohet zgjedhjeve të brendshme siç e parashikon statute.  Një shkelje e rëndë për të cilën është kritikuar edhe nga Blushi dhe që po t’i referohemi  precedentit Doshi do të mjaftonte për ta çliruar edhe vetë Ramën nga barra e kontratës me Partinë Socialiste.

l.mitro