Deklaratat e kryeministrit, reagon ambasada e SHBA: “Të gjitha vendet që punojnë për anëtarësim në BE duhet të qëndrojnë larg nga gjuha që nuk e çon përpara këtë synim”

Ambasada e Shteteve të Bashkuar të Amerikës në Tiranë ka reaguar sot rreth deklaratave me tingëllim nacionalist të kryeministrit të Shqipërisë, që theksoi opsionin e bashkimit klasik mes Shqipërisë dhe Kosovës. Në një prononcim për “Zërin e Amerikës”, një zëdhënës i ambasadës dha këtë koment: “Shtetet e Bashkuara të Amerikës, mbështesin fort aspiratat për në BE, të të gjitha vendeve në Ballkanin Perendimor dhe mirëpresin riafirmimin nga BE se këto vende ndajnë një perspektivë të qartë europiane. SHBA besojnë se të gjitha vendet që punojnë për anëtarësim në BE duhet të qëndrojnë larg nga gjuha që nuk e çon përpara këtë synim të përbashkët dhe duhet të vazhdojnë të punojnë drejt forcimit të bashkëpunimit rajonal. SHBA mirëpret garancitë që ka marrë nga qeveria e Shqipërisë se deklaratat në fjalë synonin vetëm të theksonin rëndësinë që ka integrimi në BE për shumë vende të Ballkanit". Nëse e lexojmë drejt, këto deklarata i japin edhe deklaratave të kryeministrit një karakter taktik dhe synojnë përforcimin e nevojave të Shqipërisë për të përshpejtuar hyrjen në BE. Do duhet shtuar se reagimet e aktorë e të ndryshëm ndërkombëtarë pasojnë edhe kundërveprimin zyrtar të palës serbe.
s.z