Mesila Doda thyen vendimin e grupit të PD. Voton pro heqjes së imunitetit për Doshin e Frrokun. "Nuk bëhem pjesë e lojrave politike dhe qëndrimeve ku di unë se çfarë bëj unë"

Çështja “Doshi” duket se ka sjellë çarjen përfundimtare mes deputetes Mesila Doda dhe grupit parlamentar të Partisë Demokratike. Ndryshe nga grupi demokrat që e bojkotoi votimin për heqjen e imunitetit të dy deputetëve, Doda qëndroi në sallë dhe votoi pro kërkesës së Prokurorisë së Përgjithshme. Pas përfundimit të votimit ajo shpjegoi edhe arsyet e qëndrimit të saj në sallë dhe  votës pro heqjes së imunitetit për dy deputetët. Doda tha se qëndrimi i grupit nuk ishte ne përputhje me ndërgjegjien e saj për një parlament më të mirë.

“Në momentet që na vjen një kërkesë nga Prokuroria nuk mund të bëjmë lojra politike. Nuk mund të themi ku e di unë se çfarë bëj unë. Kërkojmë dekriminalizimin e kuvendit dhe në momentin që kemi një moment të qartë nga partnerët tanë ndërkombëtarë largohemi.  Grupi ka qëndrim që nuk e pranon ndërgjegjia ime. Vazhdoj të mbetem në respekt të bindjeve të mia, do punoj për një parlament ndryshe, më të mirë”-theksoi Doda pas seancës.