Kryeministri flet nga Rumania për rrezikun e radikalizmit islamik që mund të “konvertohet në nacionalizëm fetar”. “Arsye që BE të përshpejtojë integrimin”

Kryeministri i Shqipërisë ndodhet për vizitë në Rumani ku ka nënshkruar disa marrëveshje, por edhe është vlerësuar me çmimin “Honoris Causa” nga universiteti i Bukureshtit. Në këtë aktivitet kryeministri shqiptar ka shfrytëzuar rastin për të folur për rrezikun nga radikalizmi islamik. “Ne mendojmë që ai përshkallëzim është një arsye shumë e fortë për Europën dhe për Bashkimin Europian që këtë diversitet fetar që është në Ballkan ta marrë në mbrojtje sa më shpejt, duke e përshpejtuar procesin e integrimit, duke mos bërë politika që janë taktike dhe nuk kanë asgjë strategjike në raport me vendet e Ballkanit, sepse nëse, largqoftë, ekstremizmi islam do të gjente rrugë për t’u kthyer në një nacionalizëm fetar në formën e një lëvizjeje brenda Ballkanit, do të ishte fundi i kësaj që kemi sot”, tha ai. Nuk dihet nëse radikalizmi islam paraqet realisht këto potenciale në Ballkan, apo Shqipëri, apo kryeministri sheh te kjo tezë një mjet për të luajtur përballë Europës. Dikur, me rastin e 100-vjetorit të Pavarësisë, ish-kryeministri u akuzua se po përdorte kartën e nacionalizmit si mjet presioni ndaj BE-së. Raste këto që flasin sesa demagogjike është politika e vendeve të dështuara si Shqipëria, që si problem endemik, të përhershëm dhe si pasojë vetëm e vetëm të politikës, kanë varfërinë dhe banditizmin e ardhur nga ata që qeverisin.
s.z