"Shekulli”: “Ti Visar nuk ke këllqe për në Vatikan. Njësoj si B. Mustafaj dhe Y. Aliçka që s’prodhuan asgjë për Shqipërinë. Na duhesh këtu, për letrat...”

“Visar, edhe unë jam Bujar”. Ky është titulli që kryeredaktori i gazetës “Shekulli” i ka vënë opinionit të tij të sotëm, i cili trajton përballjen mes kandidatit për ambasador në Vatikan, Visar Zhiti dhe Presidentit të Republikës, Bujar Nishani. Përkatësisht Visar dhe Bujar, siç preferon t’i thërrasë në shkrim Arbeni(Rrozhani). Dhe ia thotë troç “mikut të vet” që nuk duhet të shkojë në Vatikan si ambasador, për arsyen e thjeshtë se nuk e bën dot këtë punë. Dhe për këtë Shqipëria, sipas tij ka shembuj që nuk duhen përsëritur. “E ke vendin këtu, për shumë motive. Dhe për më të madhin motiv, këtu ke Atjonin, birin tënd të vetëm, që nuk jeton më…Nuk e ke vendin, as në Vatikan, as në ndonjë ambasadë tjetër, qoftë edhe si i ngarkuar me Punë, për të hequr qafe firmën e oponentit Bujar. Nuk mund ta bësh atë punë, nuk është për këllqet e tu dhe unë, edhe pse të vjen keq, nuk kam besim te aftësitë e tua si përfaqësues i shtetit shqiptar në Selinë e Shenjtë. Jo se nuk je katolik, por nuk ke treguar se je ekzekutiv dhe ti atje do të shkosh si pjesë e Ekzekutivit shqiptar. Po të kujtoj një “njollë” të errët në biografinë tënde ekzekutive, në ato pak muaj kur ishte ministër i qeverisë Berisha...Ke dhënë me qira deri në 500 metër katrorë sipërfaqe deri në 20 vjet. Pra ti vetëm në një muaj, pasi more postin ekzekutiv, firmose për të shitur për dy dekada, njërën prej fortesave, ku për 25 vite kishte luftuar, heroi ynë kombëtar, kalorësi i Krishtërimit, Gjergj Kastrioti Skënderbeu. Ti Visar nuk duhet të shkosh në asnjë ambasadë. Mbrojtësit e tu të shumtë ngrejnë lart penën tënde, poezinë, prozën, publicistikën dhe për këtë të marrin hopa për të të çuar në kolltukun e ambasadorit. Nuk na duhesh për atje Visar. Kemi parë shumë sivëllezër të tu, edhe ata njerëz të letrave. Po të kujtoj Besnik Mustafajin apo Ylljet Aliçkajn, edhe ata njerëz shumë të mirë, si ti. U bënë ambasadorë të Shqipërisë në Francë…dhe çfarë bënë për ta afruar Shqipërinë me Parisin zyrtar? Përdorën këtë mandat të vyer diplomatik për të lëvruar gjinitë e tyre letrare, për t’i botuar ato, por nuk prodhuan asgjë për Shqipërinë. Ti nuk mund të jesh pjesë e kësaj trupe diplomatike, që është ende rrumpallë…”, shkruan drejtuesi i gazetës “Shekulli”.
http://www.shekulli.com.al/p.php?id=218628
s.z