PLL përkujton “Triumfin e Legalitetit” edhe me disa akuza për Fan Nolin që ka thënë: “Parlamenti, një dhomë ku politikanë të pazemër mblidhen për të përdorur si kavie sojin e tyre”

Partia Lëvizja e Legalitetit ka përkujtuar sot 90-vjetorin e rikthimit në pushtet të Ahmed Zogut më 24 dhjetor të vitit 1924. E njohur si “Triumfi i Legalitetit”, ngjarja në fjalë është analizuar në shumicën e rasteve si një aksion politik, reaksionar deri disa kohë më parë, kundrejt atij që u quajt Revolucioni Demokratiko-borgjez. Në aktivitetin e zhvilluar kanë folur studiues dhe historianë, si Beqir Meta dhe ka qenë i pranishëm edhe Leka Zogu, kryetarët e partive të Ballit, Alimadhi dhe Roshi. Po sjellim atë që ka thënë kreu i PLL-së, Sulejman Gjana për revolucionin e Nolit dhe Nolin vetë, duke iu referuar fjalës së peshkopit në Lidhjen e Kombeve: “Më mirë të bëjmë luftë, sesa biseda të lodhshme si kjo për paqe”, apo, “A e dini se çfarë është një parlament? S’ka dyshim se e dini. Por çështja do të jetë më e qartë kur t’ju tregoj unë se çmendoj për këtë. Një parlament, – shtoi ai, është një dhomë ku politikanë të pazemër mblidhen për të përdorur si kavie sojin e tyre, një dhomë plot gaz helmues, gaz mbytës, gaz lotsjellës...”. Dhe sipas Gjanës, ishin këto deklarata që “i bënë Fuqitë e Mëdha të asaj kohe të kuptojnë rrezikun e qeverisë së Fan Nolit dhe nxitën rikthimin e qeverisë legjitime të para grushtit të shtetit”. Kjo e fundit do argumentuar më mirë me kundërtezën se ishin kryesisht jugosllavët, pas firmosjes së një marrëveshjeje dypalëshe, ata që mbështetën rikthimin e Ahmed Zogut, edhe pse ky u ktheu krahët shumë shpejt.
s.z