Vazhdon folklorizmi me “heroizmin” në Beograd. Kombëtarja dhe Duka marrin titullin “Qytetar Nderi” nga bashkia e Vlorës dhe ajo e Kamzës

E para që dha shembullin për të nderuar përleshjen e djemve të kombëtares në Beograd ishte Bashkia e Tiranës që pak orë pas ndërprerjes së takimit Shqipëri-Serbi i akordoi ekipit tonë përfaqësues titullin “Mirënjohja e Qytetit”.

Kjo nuk është çudi në një vend ku dekoratat dhe titujt jepen pa qeder, aq më tepër kur bëhet fjalë për të shprehur patriotizmin e lartë që rreh në zemrat e përfaqësuesve të pushtetit qëndror apo atij lokal kur bëhet fjalë për mbrojtjen e dinjitetit kombëtar.

Bashkia e Tiranës dhe kryetari i saj, Lulzim Basha e panë rrëmujën e Beogradit si një betejë patriotike, duke nxituar të veshin me lavdi mbrojtjen që lojtarët e kombëtares i bënë banderolës së vizatuar me portretet e Isnail Qemalit dhe Isa Boletinit.

Më shumë se folklorike po të mendosh që sherri për banderolën në stadiumin e Beogradit mund të ishte evituar nëse lojtarët tanë mund të ishin treguar më gjakftohtë dhe të kishin pritur vendimin e gjyqtarit të ndeshjes.

Por krenaria që ka kapur të madh e të vogël nuk la indifferent edhe bashkitë e Vlorës dhe Kamzës.

Me motivacionin për mbrojtjen e flamurit dhe simboleve kombëtare edhe këshilli bashkiak i Vlorës në një mbledhje jashtë radhe miratoi dhënien e titullit “Qytetar Nderi” për ekipin kombëtar dhe kreun e Federatës Shqiptare të Futbollit, Armando Duka.

Në motivacion shkruhet: “Për atë që bënë në fushën e blertë të Beogradit që u kthye në fushën e dinjitetit tonë kombëtar. Ata luftuan për mbrojtjen e simboleve tona kombëtare, luftuan si në një luftë të vërtetë, sepse lufta e vërtetë është lufta për mbrojtjen e flamurit dhe flamuri e ka shtëpinë në Vlorë dhe Vlora ka Ismail Qemalin, vlonjati që së bashku me Isa Boletinin fluturuan mbi Beograd dhe turpëruan Serbinë”

Edhe Bashkia e Kamzës e njohur për pagëzimin e shumë rrugëve të saj me emra të qyteteve të Europës, institucioneve Financiare Ndërkombëtare dhe kompanive apo personaliteteve të jetës demokratike vendosi dhënien e titullit “Qytetar Nderi” për ekipin kombëtar të futbollit.

l.m