Akuza: Oficeri “tradhtar” i policisë sonë, i kalonte informata Guardia di Finanza-s për trafiqet shqiptare!

Ka edhe “tradhti” të tillë: Dritan Zagani, 42 vjeçari shkodran që konsiderohej një prej oficerëve më të mirëtrajnuar në fushën e luftës kundër narko-trafikut ka dalë dje para gjykate, dhe është qartësuar se italiani misterioz që ai informonte, në fakt nuk është një qytetar i thjeshtë, as një trafikant, por një oficer i Guardia di Finanza-s. Sërish emri i tij mbahet sekret, ose të paktën kështu pretendojnë kompetentët e hetimit, por dyshohet se gjithë blloku që Guardia di Finanza iu bëri tonelatave të hashashit që dilte nga brigjet tona, ishte pikërisht për shkak të këtij komunikimi mes dy oficerëve, shkruan e perditshmja "Shekulli".
Sipas gazetës, është kuptuar se në fakt, zyrtari i Policisë, prej kohësh ka mundësuar dhënien e informacioneve të sakta në drejtim të homologëve italianë, të dhëna që policia dhe prokuroria mohojnë t`ua ketë vënë në dispozicion eprorëve të vet. Pra, një bashkëpunim jashtë linjës zyrtare nga ana e Zaganit. Duhet thënë se grupi i hetimit dyshon oficeri ka dhënë informacion kundrejt pagesës, pasi është zbuluar edhe një transfertë që është kryer për llogari të Zaganit. Mirëpo shumë pikëpyetje ngrihen pas këtyre detajeve, që e ndryshojnë historinë e ditëve të para: Sepse Zagani nuk paska qenë bashkëpunëtor i trafikantëve, por dekonspirues i tyre; nga ana tjetër, nuk mungojnë spekullimet se Guardia ka siguruar kësisoj informata që përndryshe, nuk do t’i merrte nga linja zyrtare e policisë sonë.   

a.k