Bollano me Censusin e Omonia-s në dorë: Ka rreth 300 mijë minoritarë në Shqipëri

Vasil Bollano është rishfaqur sërish në skenën politike. Kësaj radhe ai ka publikuar një statistikë për numrin e përfaqësuesve të minoritetit grek në Shqipëri, pasi OMONIA, zhvilloi atë që mund të quhet Censusi I brendshëm i saj. Gazeta “Shekulli” bën me dije këtë lajm, duke e shoqëruar me të dhënat e Bollanos. “Janë plotësuar 286.852 pyetësorë individualë prej të cilave 30% ose 86.000 në mënyrë elektronike. Shpërndarja, kujdesi në plotësim dhe  grumbullimi i pyetësorëve u bë në bazë vullnetare nga degët e  OMONOIA-s që funksionojnë në të gjitha qarqet e vendit, duke minimizuar koston e ndërmarrjes së këtij procesi. Vlerësimet e specialistëve të realizimit të këtij procesi tregojnë se janë përfshirë 85% e pjesëtarëve të Minoritetit Etnik Grek në këtë proces”, thuhet në komunikatën e OMONIA-s. “Shekulli” konkludon se sipas këtij regjistrimi, 85% e minoritetit grek në Shqipëri, sipas Bollanos, shkon në shifrën e 286 mijë njerëzve, ndërkohë që sipas Censusit 2011 pakica greke numëron 24 mijë 243 minoritarë grekë. Këtu është e natyrshme që t’i bëhet një pyetje z. Bollano: Përse gati 300 mijë minoritarë nuk e votojnë PBDNJ-në që së bashku me MEGA-n nuk bëjnë më më shumë nga disa dhjetëra mijëra vota? Dhe tjetra: a mos vallë shifra prej 286 mijë përfaqëson numrin e komunitetit orotodoks shqiptar(përfshi pakicën greke), i cili është rezident në Shqipëri e për të cilin, Censusi 2011, njësoj si për komunitetin bektashi, dha një shifër që është realisht e papranueshme? Duhet të kujtojmë se një regjistrim të brendshëm e ka organizuar edhe Kisha Ortodokse, por për të cilin ende nuk ka një shifër zyrtare…

Më shumë në: http://www.shekulli.com.al/web/p.php?id=36450&kat=87

s.z