Qeveria konfirmon: Do të ketë ulje taksash për 95% të qytetarëve

Qeveria shqiptare rikonfirmon uljen e taksave për 95% të qytetarëve shqiptarë. Kryeministri Edi Rama bëri të ditur gjatë mbledhjes së Këshillit Kombëtar Ekonomik, ku ishin përfaqësues të biznesit, të Fondit Monetar Ndërkombëtar dhe ata të Bankës Botërore, se premtimi i bërë në fushatën elektorale për taksimin do të mbahet. “Kush fiton më pak do paguajë më pak dhe kush fiton më shumë do paguajë më shumë. Për 95 për qind të njerëzve do të ketë ulje taksash. Fëmijët tanë nuk kanë asnjë borxh që ne të kthejmë në borxh të ardhmen e tyre, duke i lënë ata peng për të pasur një të ardhme ndryshe”, nënvizoi Rama. Kjo politikë e re fiskale është  pranuar edhe nga partnerët ndërkombëtarë që janë financues të Shqipërisë në këtë moment të vështirë. Paketa e re fiskale ka provokuar debate të mëdha në Shqipëri, pas lajmeve të publikuara për ekzistencën e disa varianteve në shqyrtim nga qeveria. Shqetësimi kryesor është se sa rritet barra fiskale mbi nëpunësit dhe kryesisht buxhetorët që janë edhe shtresa e mesme në Shqipëri, për të mos lënë pas edhe biznesin, i cili ndër të tjera pret nga qeveria edhe shlyerjen e një borxhi që shkon diku te 250 milionë dollarë. Në fund duhet thënë se si rrallë herë më parë paketa e re fiskale dhe ky lloj taksimi është kontestuar edhe nga aktorë të ndryshëm të jetës ekonomike në vend, përveçse opozitës që stabilizoi taksën e sheshtë. Por diskutimit për financat publike nuk i kanë munguar edhe deklaratat e forta. Një ditë më parë, kryeministri deklaroi se ekonomia është në prag të cenimit të ekuilibrave, i shoqëruar nga kreu i opozitës, Lulzim Basha se vendi ndodhet para një kolapsi.

Më shumë në: http://www.top-channel.tv/artikull.php?id=269065

s.z