Reagon Ambasada Amerikane: Respektojmë vendimin e Ramës, vlerësojmë mbështetjen e qeverisë shqiptare

Menjëherë pasi Edi Rama dha vendimin për t’i thënë Jo ardhjes së lëndëve kimike në Shqipëri, ka reaguar Ambasada Amerikane në Tiranë, e cila vlerëson seriozitetin që qeveria e ka shqyrtuar këtë çështje dhe konfirmon miqësinë jetëgjatë mes dy vendeve.

“Shtetet e Bashkuara do të vazhdojnë të punojnë me aleatët dhe partnerët si dhe me ONAK dhe Kombet e Bashkuara për të siguruar eliminimin e programit të armëve kimike të Sirisë. Mbetemi besimplotë se do ta përfundojmë eliminimin e programit brenda afatit për të cilin është rënë dakord”, thuhet në deklaratë.

“Shtetet e Bashkuara dhe Shqipëria kanë një miqësi të fortë dhe jetëgjatë. Ne vazhdojmë të mbështesim qeverinë dhe popullin e Shqipërisë teksa punojnë për të ndërtuar një shoqëri më të drejtë dhe më demokratike”, përfundon deklarata.

Zh.