Pas rezistencës në Shqipëri, del opcioni i Kosovës?

Menjëherë pasi doli lajmi se qeveria shqiptare po bëhet gati të bëjë prapakthehu në negociatat me partnerët ndërkombëtarë lidhur me armët kimike, t’i thojë ‘jo’ pra sugjerimit që i është bërë për asgjësimin e këtyre armëve në territorin shqiptar, ka dalë lajmi tjetër i çuditshëm. Asgjësimi i armëve do të bëhet në Kosovë. Duket sikur ndërkombëtarët janë të fiksuar pas opcionit të asgjësimit me pahir në tokë shqiptare.

Këtë lajm e jep gazeta Express online. Nuk jep burimin, por thekson se “pas refuzimit të pritshëm nga ana e qeverisë së Tiranës nën presionin e protestuesve”, mbetet si alternativë Kosova. Një burim i paidentifikuar u ka thënë gazetarëve të Express-it se armët e lëndët kimike “do të depozitohen në strehimoret e aeroplanëve ushtarakë nën malin e Goleshit, dhe do të asgjësohen në furrat e shkritores së Trepçës”.

Në këto rrethana hamendësohet dhe përfitimi që do të ketë Kosova. Nuk është në dollarë, si në rastin e qeverisë shqiptare. Është përfitim i një trajte tjetër. Do të shtohet numri i njohjeve ndërkombëtare të Kosovës. Kjo thuhet në Express.

Re.Pu.