Halimi mer “hak” për 21 janarin

Ministri i Drejtësisë, Eduard Halimi, kërkon procedimin disiplinor ndaj kryeprokurorit të Tiranës, Sokol Malaj. Ky i fundit drejton hetimet për ngjarjet e 21 janarit, në një kohë që midis qeverisë dhe akuzës ka pasur “përplasje” për këtë çështje, aq sa mazhoranca aktuale ngriti një komision hetimor pas “puçit të shtetit” dhe vendosi në krye deputetin e atëhershëm, Eduart Halimi, tashmë ministër i Drejtësisë. Arsyeja e kërkesës për procedimin disiplinor ndaj Malajt është politika e dënimit e ndjekur ndaj të pandehurit Konstandin Xhuvani, djali i deputetes Luiza Xhuvani, i cili u dënua nga Gjykata e Tiranës me 2 vjet burg.

Në letrën dërguar Presidentit Topi dhe Kryeprokurores Ina Rama, ministri Halimi justifikon veprimin duke u shprehur se: “siguria publike dhe jeta e qytetarëve janë absolutisht parimet më të rëndësishme të cilat duhet të sigurojnë sundimin e ligjit në vend. Barazia e njëjtë para ligjit për të gjitha subjektet dhe ndjekja e së njëjtës politikë penale, janë parime fondamentale të parashikuara shprehimisht si themele të Kushtetutës”. Sipas tij, një politikë penale që kërkon vetëm 2 vjet burgim ndaj agresorëve të jetës së qytetarëve, është e papranueshme.

Vetë Sokol Malaj shprehet se përgjigjet e mbrojtjes së tij do t’i japë para Këshillit të Prokurorisë dhe Kryeprokurores Ina Rama nëse do të duhet. Ndërkohë që nga prokurorët në tërësi kjo nismë e Halimit shihet si një “hakmarrje” personale ndaj akuzës, pasi komisioni hetimor nuk ka gjetur asnjë të dhënë që të implikojë drejtuesit e prokurorisë në këtë çështje.

A.K.