Rishfaqet Mihal Delijorgji, tani si pronar i truallit nga ku po dëbohen romët

Një nga të akuzuarit për tragjedinë e Gërdecit, ku humbën jetën 26 njerëz, Mihal Delijorgji, është rishfaqur në skenë, por kësaj here si pronari i truallit ku prej disa ditësh ka nisur dëbimi me forcë i familjeve rome. Në atë tokë është parashikuar të ndërtohet një kompleks pallatesh. “A1 Report” ka filmuar Delijorgjin brenda zonës së rrethuar dhe thotë se punimet nuk janë ndaluar, siç edhe ishte urdhëruar para ca ditësh, por përkundrazi vazhdojnë, ndërsa romët kërcënohen. “Kjo nuk është e romëve, dilni jashtë!", i është drejtuar Delijorgji kameras së A1 Report. “Eshtë pronë private zonjë; ose dil ose lajmëroj policinë. Nuk ke të drejtë të shkelësh këtu, vazhdo jashtë!"

A1 Report thotë se megjithëse Drejtori i Përgjithshëm i Policisë, Hysni Burgaj urdhëroi mbrojtjen e familjeve rome, asnjë patrullë policie nuk duket pranë. Prej disa ditësh, edhe Avokati i Popullit ka bërë thirrje për zgjidhjen e kësaj situate, në mbrojtje të familjeve rome. Ndërkohë, Amnesty International është shprehur se as qeveria dhe as bashkia nuk kanë bërë asgjë për t'i ndihmuar apo atrehuar përkohësisht familjet rome.

Re.Pu