“Kush na e ka fajin” dhe një barcaletë me vlonjatë e Baxhakut

Për të treguar se kemi jetuar me idenë (jo dhe aq demokratike) se fajin na e ka “i madhi”, Fatos Baxhaku e nis me një barcaletë shkrimin e sotëm te Shqip, të titulluar “po tani, cili do të na e ketë fajin?”:

“Dy shokë të ngushtë e kishin bërë zakon që të pinin kafen e mëngjesit gjithmonë bashkë e gjithnjë në të njëjtin klub të lagjes. Një ditë prej ditësh njëri prej të dyve po rrinte turivarur. Ishte krejt i dërrmuar. Dukej sheshit që diçka e rëndë i kishte ndodhur. “Pa më thuaj ç’të ka ndodhur! Jemi apo nuk jemi vëllezër xhanëm!?”, i drejtohet shoku i merakosur. Porse fatkeqi, në fillim, refuzonte të tregonte se çfarë i kishte ndodhur një natë më parë. Bam e bum e bum e bam, ky muhabet vazhdoi nja dy orë të mira. Si u rrëkëllyen disa kupa me raki të fortë Sevasteri, më në fund fatkeqi vendosi të rrëfehej: “Gruaja dje e dinte se unë isha me shërbim. Shërbimi u anulua. Kur u ktheva në shtëpi e gjeta gruan në shtrat me një tjetër. Hall i madh byrazer”. A e dini si reagoi shoku? “Jo more jo, edhe këtë punë ta bëri Saliu!”, protestoi ai fuqishëm.”

Arsyen se pse e kërkojmë te “beu” që kemi në shpinë dhe të mirën dhe të keqen, Baxhaku e gjen te kultura e mangët demokratike, duke pohuar se “ka qenë vetë Berisha që e ngriti këtë kultin e admirim-urrejtjes ndaj tij.” Për të treguar sa “faj” ka për çdo gjë Berisha, në fund të shkrimit, Baxhaku sjell dhe shifra:

“Zyrtarisht 176 të vdekur vetëm në muajt e fundit. Pikërisht ata që nuk hipin në makinë pa tre dopio raki, bash ata ankohen se nuk bëhet shtet. Bash ata nuk e kanë idenë se çfarë do të thotë të presësh këmbësorin në vizat e bardha. Po për shoferët e dehur cili na e ka fajin, Berisha, Rama, apo vetë rakia?”

Dhe e mbyll duke thënë se ka edhe shqiptarë të tjerë që “nuk kërkojnë fajtorë për të fshehur në mënyrë hipokrite të këqijat e shumta të këtij vendi, por mundohen t’i rregullojnë vetë ato.  Politika, nëse ka mend duhet të motivojë këtë pjesë të shoqërisë, ashtin e saj të mbarë, pjesën që do punën, kulturën, artin, djersën e ballit.”

k.c.

I plotë:

http://gazeta-shqip.com/lajme/2013/07/11/po-tani-cili-do-te-na-e-kete-fajin/