Raporti: 180 mijë emigrantë të kthyer nga Greqia. Shtohet presioni mbi shërbimet publike

Rreth 18-20% e emigrantëve shqiptarë që prej vitesh jetonin e punonin në Greqi, ose rreth 180 mijë vetë, janë kthyer në Shqipëri për shkak të krizës greke. Sipas një raporti nga Qendra Shqiptare për Konkurrueshmërinë dhe Tregtinë Ndërkombëtare, shkak për këtë kthim masiv, janë bërë taksat e larta dhe rritja e kostove të jetesës në Greqi, pa harruar edhe papunësinë që ka arritur shifra rekord me 27.4%. Megjithatë, “pas shumë vitesh qëndrimi dhe jetese në Greqi, rikthimi në Shqipëri nuk është i lehtë për ta”, thuhet në raport. “Disa vite më parë, autoritetet shqiptare tentuan ta bënin më të lehtë procesin e integrimit për të rinjtë që ktheheshin nga një qëndrim i gjatë në Greqi. Zyrat e emigracionit parashikojnë një ndihmë mujore prej 8 mijë lekë për familje, por vetëm 5% përqind e të riatdhesuarve kanë kërkuar që ta marrin këtë shumë”, shpjegon raporti. Sipas tij, vala e emigrantëve të kthyer pritet që të ushtrojë presion të fortë mbi shërbimet publike në vend, më së shumti mbi sistemin arsimor dhe atë shëndetësor, ndërkohë që në kostot që e shoqërojnë këtë proces, shtohen edhe problemet psikologjike, sidomos për fëmijët.

Re.Pu.