Rama-Meta në një konferencë “sintezë” për shtypin

U mor vesh se konferenca për shtypin e Ramës e Metës së bashku nuk ka pasur lidhje me ndonjë klimë momentale të fushatës. Ajo kish formën e një konference sintezë, në të cilën ata kanë përcjellë mesazhet e fundit, e mbi të gjitha mesazhin e një aleance që do të funksionojë dhe nesër, pas zgjedhjeve, në çdo rrethanë.

Konferenca ishte e toneve të qeta, nuk pati denoncime, nuk u përmend kundërshtari (Meta në dy raste iu referua si “zoti Berisha” në përgjigje të pyetjes lidhur me një aleancë të mundshme mes tij e Berishës pas zgjedhjeve), dhe u përsërit një apel i përbashkët për të votuar opozitën. Meta nënvizoi se opozita do të marrë 80 mandate (77-80, ishte shifra e dhënë nga Rama). Po Meta, pasi theksoi qartë se “historia e bashkëpunimit me Berishën është njëherë e mirë e mbyllur”, la të kuptohet se pas zgjedhjeve, kjo aleancë e tyre do të zgjerohet më tej. E ka pasur fjalën për partinë e Bamir Topit? Apo për ndonjë aleat të sotëm të Berishës? Kjo gjë nuk u saktësua nga ai, ndonëse gazetarët e cytën që ta sqaronte.

Rama donte të shkurajonte përpjekjet e opozitës për të festuar para kohe. Ai përcolli idenë se beteja s’ka mbaruar akoma, se vota duhet mbrojtur, se secili opozitar duhet ta dyfishojë votën e tij duke marrë me vete dhe një votues tjetër. Ai e përkufizoi 2-3 herë LSI-në si aleat strategjik.

Re.Pu.