Lajmi që po trondit botën: NSA-ja di çdo gjë lidhur me ata që përdorin yahoo, youtube, facebook, google, skype, etj

Diku në Utah, pranë bazës ushtarake Williams, në një sipërfaqe prej 100 mijë metra katrorësh, Agjencia Amerikane e Sigurisë Kombëtare (në foto, qendra e saj në Maryland) po ndërton ndërtesa të mëdha, brenda të cilave do të instalohen kompjutera super të shpejtë. Projekti kushton 2 miliardë dollarë, dhe kompjuterat do të jenë në gjendje të magazinojnë një volum kolosal të dhënash, të paktën 5 miliardë gigabyte. Vetëm sistemi energjitik që do nevojitet për të ushqyer sistemin e ftohjes për serverat do të kushtojë 40 milionë dollarë për çdo vit. Serverat janë aq të mëdhenj, thotë një ish punonjës i kësaj agjencie (Thomas Drake) për Spiegel-in, saqë mund të magazinojnë tërë komunikimin elektronik botëror për 100 vitet e ardhshme.

Çfarë janë këto të dhëna që merren e magazinohen? Janë të dhëna personale mbi njerëzit në të gjithë botën, dhe këtu përfshihen emaila, biseda në skype, kërkimet në google, video Youtube, postime në facebook, transferta bankare, etj. Kjo është e mundur në sajë të aksesit që kjo agjenci ka tek serverat që u përkasin kompanive amerikane të Internetit qysh nga viti 2007. Të gjitha kompanitë kanë bashkëpunuar, në fillim ka qenë Microsoft-i. Pastaj “u fut në grackë” Yahoo-ja, e pastaj me radhë Google, Facebook, PalTalk, Youtube, Skype, dhe AOL. E fundit që deklaroi gatishmërinë e saj për të bashkëpunuar ishte Apple (2012). Të paktën, sipas Spiegel-it.

Sikur kjo të jetë e vërtetë (kompanitë në fjalë e kanë mohuar një gjë të tillë hë për hë), atëherë kjo agjenci amerikane ka mundësinë të dijë se çfarë është duke bërë çdo person (që përdor shërbimet e këtyre kompanive) në këtë botë në një moment të caktuar. E frikshme!

Re.Pu.