Gjeneral Sandër Lleshi bën denoncime të rënda lidhur me atë që ndodh në Ministrinë e Mbrojtjes

Sandër Lleshi, gjenerali i sapo shkarkuar me dekret presidencial nga posti i zv. Shefit të Shtabit të përgjithshëm, ka dhënë një intervistë për Lindita Çelën e Temës, dhe duket se është në një gjendje shpërthyese. Madje, edhe pse premton që do të flasë në ditët e ardhshme, ai nuk heziton qysh tani të bëjë denoncime të forta. “Nëse një gjeneral flet me zë të lartë për të trajtuar problemet e Forcave të Armatosura të sigurisë dhe të atdheut, ai rrezikon karrierën, familjen apo dhe të ardhmen e tij. Por nëse ai hesht, rrezikon atdheun e tij. Tani përballë këtyre dy rreziqeve, unë po zgjedh të flasë.”, thotë Lleshi.

Po pse e kanë shkarkuar? Ja mendimi i tij: “Gjithçka ka lidhje me qëndrimet e mia, me profilin tim, me identitetin tim profesional në karrierën time, por kryesisht ka lidhje me qëndrimet e mia, të cilat janë artikuluar në mënyrë konstante gjatë viteve që isha në atë detyrë. Qëndrime, të cilat mund të them se jo rrallëherë, por shpeshherë, kanë rënë ndesh me qëndrimet e ministrit të Mbrojtjes dhe shefit të Shtabit të Përgjithshëm të Forcave të Armatosura. Bëhet fjalë për qëndrime që trajtojnë parimet të mëdha të funksionimit dhe drejtimit të Forcave të Armatosura. Unë këto i kam thënë zyrtarisht. Gjithçka që them sot, e sidomos ato që do të them nesër publikisht, unë i kam thënë zyrtarisht.”

Në këtë intervistë ai zbulon dhe një fakt të shëmtuar. Ministria e Mbrojtjes po përdoret në fushatë elektorale. “Unë e them me trishtim, me dhimbje, që [ministria po përdoret në fushatë]. I jam drejtuar me shkrim dhe i kam kërkuar zyrtarisht ministrit Imami që të heqë dorë nga keqpërdorimi i Forcave të Armatosura jashtë funksionit të tyre. … Në fakt po ndodh e kundërta. Po përdoren asetet e parashikuara për emergjenca civile në kushte  normale”, thotë ai.

Intervistën e plotë mund ta gjeni në linkun http://www.gazetatema.net/web/2013/05/29/intervista-sander-lleshi-atdheu-eshte-ne-rrezik-nga-arben-imami/

Re.Pu.