Braçe dhe rreth 15 të tjerë, të pasigurtë. Në lista, një pjesëtar i familjes Kokëdhima - shkruan MAPO

E përditshmja MAPO rendit sot listën e deputetëve të PS-së të cilët nuk do jenë më në lista dhe thotë se bëhet fjalë për rreth 15 të tillë. Erjon Braçe dhe Arben Malaj janë të pasigurtë, sipas MAPO-s ndërkohë që disa të tjerëve “vetë kryesocialisti Edi Rama në takime direkte me ta u ka bërë të ditur vendimin e tij ose për të mos i kandiduar fare, ose për t’i kandiduar në vende të pasigurta”. Gazeta rendit ndër ta, emrat Ilir Gjoni, Marko Bello, Agim Leka, Shegushe Ligori, Ilir Bejtja, Alfred Dalipi, Eltar Deda, Albert Çaçi, Et’hem Ruka etj.

MAPO shkruan se në lista do jetë një pjesëtar i familjes së biznesmenit Koço Kokëdhima. Shkruan MAPO: “Një dilemë që kreu socialist duhet t’i japë një zgjidhje gjatë ditës së sotme është edhe ajo për të kandiduar një nga pjesëtarët e familjes Kokëdhima. Ndërsa deri para pak ditësh ishte folur për kandidimin e mundshëm të vajzës së kësaj familjeje, këngëtares Besa Kokëdhima, dje në ambientet e selisë rozë përflitej dhe kandidimi i mundshëm i Brixhida Kokëdhimës në qarkun e Vlorës…” a.n.