Pse Mourinho nuk mundi të fitojë me Realin një Champions League?

Gazetari sportiv i së përditshmes italiane il Corriere della Sera, Tommaso Pellizzari ka dhënë një numër arsyesh, pse ka dështuar Mourinho me Realin e tij në kompeticionin Champions League.

Sipas tij, që citon vetë Mourinho-n, së pari “është fjala për një kompeticion, ku vendosin detalet e çikërrimat”. Dhe detalet që e kanë bërë të pafat trainerin e famshëm portugez kanë të bëjnë me kalendarin e tre herëve të fundit. Parvjet Realit i ra të ndeshej në ½ finale me Barçën, që ish në kulmin e vet. Vjet i ra të ndeshej me Bajernin, dhe u skualifikua me penalti. Ndërsa sivjet me Dordmundin, që është më e vështira për t’u mundur.

Së dyti, Mourinho-s i ka rënë të ndeshet në ½ finale në dy vitet e fundit me një skuadër gjermane, dhe është marrë vesh se këto dy vite gjermanët janë mbretërit e futbollit europian. Spanjollët nuk janë më të parët.

Së treti, është vetë Mourinho që nuk ka demonstruar se është i zoti, në ndryshim nga rrethanat kur kish Chelsea-n e Inter-in, për të ndërtuar një skuadër të përsosur taktikisht e të pamposhtshme në pikëpamje agonistike, ku lojtarët të jenë gati “të japin dhe jetën” për trainerin e vet.

Së katërti, Mourinho është mësuar të luftojë në krye “të një skuadre të vogël e të dobët kundër të mëdhenjve”, ndërsa këtë herë ishte në një skuadër të madhe, për më tepër spanjolle, së cilës nuk kish se ç’t’i jepte.

Së pesti, Mourinho nuk ka asnjëherë një plan ‘B’, që ta vërë në punë kur nuk ecën mirë plani ‘A’, dhe ky është një nga limitet e tij.

Së gjashti ishte konflikti me Iker Casillas-in, i cili është jo vetëm flamuri i Realit, por edhe flamur i kombëtares spanjolle.

Re.Pu.