Menduh Thaçi nuk lejohet të kalojë kufirin grek

Menduh Thaçi (lider i PDSH në Maqedoni) është penguar të marrë pjesë në kongresin e partisë së Kryeministrit të Republikës së Turqisë, Rexhep Tajjip Erdogan, nga një incident banal në kufi. Ai, nuk është lënë të kalojë. Zoti Thaçi i ka kërkuar ambasadës greke në Shkup sqarime për këtë, por nuk ka marrë përgjigje dhe si pasojë është detyruar t’i drejtohet më një letër vetë kryeministrit grek Antonis Samaras.

Siç raporton Koha Ditore, në letër thuhet se, “Gjatë kthimit tim nga një udhëtim zyrtar në Ankara, ku kisha nderin të jem mysafir në kongresin e partisë së Kryeministrit të Republikës së Turqisë, z.Rexhep Tajjip Erdogan, nëpunësit e pikës kufitare të shtetit Tuaj më mohuan të drejtën për të hyrë në Greqi me pretekstin se shoferi im nuk posedon ‘patentë ndërkombëtare për makinën’”, thuhet në letrën e lideri të PDSH-së, drejtuar kryeministrit Samaras.

 Thaçi në letër ka reaguar edhe për provokimet tjera të autoriteteve greke ndaj gazetarëve shqiptarë si dhe çamëve të cilët nuk janë lejuar të kalojnë kufirin.

“Z.Kryeministër, Duke patur parasysh se qeveria Juaj shpall persona “non grate” gazetar të një mediumi të fuqishëm shqiptar, nuk i lejon çamët që të vizitojnë vatrat e tyre që sot gjenden nën shtetin Tuaj dhe shumë provokime tjera ndaj shqiptarëve, rasti im nuk është rast “i izoluar dhe i rastësishëm” por thjesht e lustron qasjen armiqësore të qeverisë së Juaj karshi shqiptarëve”, thuhet më tej në letër.

Mbyllja e letrës është gjithashtu mjaft thumbuese për grekët: “Përderisa ne si komb aspirojmë të sigurt drejt familjes së madhe europiane, duke i kultivuar vlerat pozitive të saj qeveria dhe kombi Juaj fatkeqësisht shkojnë në kahje të kundërt duke u bërë një shembull i keq jo vetëm në aspektin ekonomik por edhe atë civilizues dhe demokratik.Në fund, z.Kryemistër pa asnjë respekt për Ju dhe qeverinë Tuaj fatkeqësisht jo vetëm për mua por për të gjithë shqiptarët Greqia do të vazhdojë të ngele në mbamendjen tonë si një shtet që vazhdon të mbaje armiqësi jo vetëm me kombin tim por edhe me kombet tjera në rajon e më gjërë”, thuhet në fund të letrës të publikuar nga Koha Ditore.

k.c.