Shkrimet mbi Migjenin, dhe titujt mashtrues të gazetave

Janë shkruar shumë artikuj mbi Migjenin në 100 vjetorin e lindjes së tij. Janë të pakta rastet e ngjashme, kur në një përvjetor lindjeje të një personaliteti të kulturës sonë të jenë bërë kaq shkrime, të cilat jo vetëm kanë qenë çalltisje individuale e të paporositura, por edhe kanë konstrastuar me një indiferencë e përtaci të establishment-it politik. Shkrimet më të fundit ishin në numrin e sotëm të Shekullit, dhe mbanin firmën e Rudolf Markut dhe të Lekë Tasit. Marku thekson një ide disi novatore, dhe thotë së pari që Migjeni, edhe pse i njohur dhe “i akuzuar” si ateist e antiklerikal, rri fort bukur krah Fishtës, Koliqit, Prenushit, Anton Arapit, Lazër Shantosë, dhe së dyti që krijimtaria e Migjenit është në thelb e krishterë.

Ndërsa Lekë Tasi replikon me do gazeta, të cilat e kanë bërë zakon të spekullojnë me titujt e shkrimeve. Ai shfaqet i skandalizuar sidomos kur kjo praktikë bëhet mbi kurrizin e personaliteteve të kulturës sonë në rrethana të ditëve përkujtimore që lidhen me ta. “Në një rast”, thotë Tasi, “shkruanin mbi intervistën e fundit që ka dhënë Fan Noli në këtë botë, dhe në titull nënvizohej që peshkopi Theofan e ka pranuar tradhëtinë bashkëshortore, pasi edhe Jezu Krishti nuk ka qenë kundër saj; në fakt, po të lexoje intervistën, ai thosh bash të kundërtën”.

Por arsyeja e zemërimit të Lekë Tasit ka të bëjë me një spekullim që është bërë në lidhje me Migjenin. Në disa gazeta i është mëshuar qysh në titull faktit që Migjeni e ka humbur virgjërinë me një prostitutë, apo siç raportohet të ketë thënë vetë ai, “me njenën nga ato”. Në fakt, në materialin e publikuar (është fjalë për një shkrim të Nasho Jorgaqit), nuk del kjo gjë; përkundrazi, del që ai ndërron mendje në momentin e fundit (prej banalitetit të asaj situate), dhe nuk e bën “me njenën nga ato”. Gazetari ka gënjyer në titull.

E.G.