Ministria e Mbrojtjes refuzon kontrollin parlamentar të aktivitetit të vet!!??

Pretendimi i deputetit Piro Lutaj është në kufijtë e të pabesueshmes. Në Temën online raportohet se “deputetët e PS-së, anëtarë të Komisionit për Sigurinë Kombëtare, nuk janë lejuar të kryejnë mbikqyrjen e kontrollin parlamentar të Ministrisë e Mbrojtjes, gjë që po bëhej në vijim të vendimit të marrë në këtë komision”. Dhe po aty citohet Lutaj të ketë thënë se “ditën e premte, më datë 29 Qershor, pas kontakteve me sekretarin e përgjithshëm të Ministrisë së Mbrojtjes nga ana e kryetarit të Komisionit për Sigurinë Kombëtare, anëtarët socialistë të Komisionit, u njoftuan se Ministria e Mbrojtjes nuk e pranon këtë Komision që të ushtrojë funksionet e veta Kushtetuese, pa dhënë asnjë arsye lidhur me këtë”.

Deputeti Erion Braçe, shumë aktiv në rrethana të tilla, bën fillimisht një resume të situatës: “Ministri i Mbrojtjes, Arben Imami, konsumoi të premten që shkoi një akt të paprecedent, teksa ndali e pengoi një kontroll të plotë të Komisionit të Sigurisë Kombëtare të Kuvendit! Kontrolli demokratik mbi Forcat e Armatosura është një prej parimeve kryesore kushtetuese në demokraci! Atë nuk mund ta garantojë një anëtar i kryesisë së PD, por Kuvendi, opozita mbi te gjitha! Arben Imami e ndali sot këtë kontroll duke i dhënë një grusht të fortë Kushtetutës!”

Braçe e ka një ‘pse’ të tijën. “Ministria e Mbrojtjes dhe një sërë kompanish të ndyra janë përfshirë në një xhiro marramendëse të tregtisë së armëve duke përfshirë Malin e Zi e Serbinë, por edhe vende të tjera larg nga rajoni. Armë gjithfarësh kanë hyrë e kanë dalë nga Shqipëria”, thotë ai.

Re.Pu.