Bilal Kola: Qeveria Rama në dy vjet likuidoi të përndjekurit sa qeveria Berisha në 8 vjet

Në emisionin “Jamais Vu” të gazetarit Mustafa Nano, këtë të shtunë ishte e ftuar për intervistën fotografike Bilal Kola, kreu i Institutit të Integrimit të të Përndjekurve Politikë. Duke folur rreth integrimit të ish-të përndjekurve politikë të regjimit diktatorial, Bilal Kola i dha këtë përgjigje: “Të përndjekurit janë rreth 30 për qind të popullatës, sipas të dhënave që ka Instituti që në fillim të viteve ‘90. Aktualisht po shihet që nga kryeministri aktual ka një predispozitë të madhe që moralisht dhe financiarisht të japi ish të përndjekurve atë që meritojnë. Në dy vite kjo qeveri dëmshpërbleu në masën 40 milion dollarë atë që bëri qeveria tjetër në 8 vite, e cila ndau 44 milion dollarë. Këto janë fakte. Ky proces do të ketë dy faza, likuidim për ata që janë gjallë dhe që sipas premtimeve të qeverisë do të bëhet brenda këtij mandati, dhe për trashëgimtarët ku do të duhet edhe një mandat tjetër. Për sa i përket rehabilitimit moral, projektligji për hapjen e dosjeve është gjëja më e mirë që po bëhet. Kjo do nxjerrë në pah makinerinë përçudnuese të Sigurimit të Shtetit. Qëllimi i ligjit është rehabilitimi moral i ish të përndjekurve politik”.