Xhezair Zaganjori shfaqet për herë të parë në TV me zë e figurë

Xhezair Zaganjori bën daljen e parë publike, e cila, nëse nuk zgjidhet President, do të jetë dhe e fundit (po të besojmë se ai do të vijojë, si deri më sot, të mos mbajë një profil publik). Për mikrofonat e televizionit Ora Neës, ai thotë se i është dashur të mendohet pak për t’i thënë ‘po’ propozimit të maxhorancës: “Fillimisht e kam kundërshtuar për disa arsye; së pari mendoj se maxhoranca dhe opozita kanë minimalisht dhjetra persona [të tjerë] që mund ta kryejnë këtë detyrë shumë mirë; së dyti mendoj që është përgjegjësi e madhe; së treti nuk më ka shkuar asnjëherë në mend ta kryej këtë detyrë”.

Por tani që ka pranuar, shpreson të votohet. “Nëse do votohem, do përpiqem të bëj më të mirën për të përmbushur detyrimet e mia ligjore e kushtetuese në mënyrë që ta meritoj [titullin] ‘përfaqësues i unitetit të popullit’”, thotë ai. Por e ka marrë qetë këtë punë, madje llogarit dhe humbjen: “Nëse nuk do miratohem, atëherë do të bëj atë punë që kam bërë gjithmonë, ... do merrem me mësimdhënie, me konferenca, me shkrime”.

“E sheh veten si figurë konsensuale”?, pyet gazetari. Dhe Zaganjori përgjigjet: “Shpresoj që të garantohet një mbështetje sa më e gjerë. Shpresoj. Nëse jo, atëherë [do të prisja] me kënaqësi që të zgjidhej [dikush tjetër] që garanton konsensus më të madh”.

Re.Pu.