Francezët janë çliruar më në fund prej imazhit, e pushtetit, të Carla Brunit?

Çfarë do bëhet me Carla Brunin tani? Në web ka komente jo simpatike për të pas humbjes së Sarkozy-së. Përqeshet, i hidhen spica, hamendësohet kotmëkot se ajo mund ta lërë Sarkozy-në tani që s’është më President. Dhe flitet me një gjuhë shumë të shkujdesur, me po atë gjuhë që lexuesit shqiptarë komentojnë rubrikat rozë të Temës online. E ndonëse bëhet fjalë për atë që është ende zonja e parë e Francës edhe për ca ditë, për shumë të tjerë është lajm i mirë që ajo, vajza e pasur, supermodelja, këngëtarja, femra që u ka prishur mendjen shumë burrave, etj, etj, e ka lënë më në fund pallatin Élysée. Ka plot batuta të liga në adresë të saj, si fjala vjen: "Italiania do lërë hungarezin", “Qysh të dielën, Carla Bruni është sërish në treg”, “Ka dalë në treg një Video sexy e Carla Brunit me Hollande-in”, “Carla Bruni e ka përditësuar statusin në facebook; ka hequr statusin ‘e martuar’ dhe ka vënë statusin ‘single’”, “Është parë një kant-autore që stononte qamet në aeroportin Roissy”, “Carla Bruni ka hyrë në ambasadën italiane në Paris, e ka kërkuar azil”, “Carla Bruni i ka dërguar një sms Presidentit të ri”, etj, etj,

Në fakt, francezët nuk e kanë dashur, e kanë parë qysh në krye të herës si një grua-trofe, si një grua instrumentale, e nuk është çudi që Sarkozy të jetë penalizuar dhe prej saj, më saktë prej lidhjes me të, që ish një lidhje tepër mediatike, e shoqëruar me egzibiconizëm, protagonizëm, betejë imazhesh, etj, etj.

E meriton Carla gjithë këtë animozitet francez?

E.G.