Paskal Milo: Qosen e duan më shumë në Shqipëri se në Kosovë

Rasti i promovimit të një libri të Rexhep Qoses në Prishtinë ka shërbyer edhe si “platformë” për mbrojtjen e akademikut kosovar të përfshirë në një radhë deklaratash e sulmesh kundërthënëse me anëtarë të Akademisë së Shkencave të Kosovës dhe LDK-në. Në takim kanë qenë të pranishëm edhe ish-presidenti Rexhep Meidani, aktivisti Adem Demaçi, ministri i Arsimit të Kosovës Ram Buja, dhe ish-ministri i Jashtëm shqiptar, Paskal Milo. Ky i fundit, njofton Kosovapress, duke lëvduar figurën dhe veprën e akademikut është shprehur se Rexhep Qosen Shqipëria e do më shumë se njerëzit në Kosovë. “Ju që e keni këtu në Kosovë dhe që keni mundësi të kontaktoni dhe ta dëgjoni e lexoni, atë aq sa ka mundësi ai të prodhojë e që unë jam i bindur që ai ka shumë për të dhënë, mos e lini që të bjerë ndonjëherë viktimë e sulmeve të pa merituara të njerëzve që janë xhelozë dhe asgjë më shumë“, ka thënë Milo. Akademiku Qosja nuk ka dëshiruar të ndalet gjatë te akuzat e drejtuara kundër tij. Më shërbejnë të dyja, si kritikat ashtu dhe lavdërimet, ka thënë Qosja. “Prandaj unë dua t’i falënderoj këta kolegët e mi të nderuar; dhe ata që më kritikojnë, edhe këta edhe ata i kanë dhënë kontribut punës time “, ka vazhduar ai.

H.B.