Partia zvicerane: Kosovarët jashtë!

Një parti politike zvicerane SVP/UDC ka filluar një fushatë antiemigracion në shtypin e shkruar të vendit nën logon “Disa kosovarë therin një zviceran”. SVP/UDC e ka lidhur drejtpërdrejt iniciativën e saj «Stop emigracionit masiv» me aktet e dhunës të shtetasve kosovarë në Pfäffikon dhe në Interlaken. Gazetat zvicerane të së dielës i kanë bërë vend në faqet e tyre një reklame me pagesë të SVP/UDC me moton në fjalë. Droja e instrumentalizmit të incidenteve të fundit të dhunshme nga ana e partisë së djathtë më në fund është kthyer në realitet. Reklama që figurativisht ilustrohet me një radhë këmbësh që shkelin mbi një platformë të kuqe ku shtrihet flamuri i bardhë zviceran shoqërohet edhe me fjalët: Këto, pra, janë pasojat e imigrimit masiv, kur ne e humbim kontrollin. Disa kosovarë therin një zviceran (…) Mundësit amatorë Roland G. (38 vjeç) dhe Karl Z. (45 vjeç) janë ulur më 15 gusht në taracën e një lokali në Interlaken të Bernës. Një taksi ndalet paprimtas dhe dy kosovarë (33 dhe 31 vjeç) dalin nga vetura. Fillojnë t’ i provokojnë dy zviceranët. «Zviceranë muti ! Të poshtër !», sipas një dëshmitari okular. Mundësi, fitues i dymbëdhjetë medaljeve, Karl Z. pyet: «Ç’po ndodh?» Njëri nga kosovarët nxjerr thikën dhe e ther në qafë zviceranin». Nuk është hera e parë që SVP/UDC përdor fushata të tilla emigracion ku në qendër janë emigrantë shqiptarë nga Kosova të mbërritur në këtë shtet në disa valë dyndjesh, më e fundit prej të cilave ajo pas spastrimit etnik serb në vitin 1999. Teksti i reklamës në fjalë përmban një titull provokues me mesazh përgjithësues, i cili mund të ngjallë frikë si dhe t’i shtojë paragjykimet ndaj kosovarëve dhe të huajve të tjerë.   

L.A.