Nuk po realizohen as të ardhurat e qethura të buxhetit

Në muajin korrik, qeveria u detyrua për të n-tën herë të rishikojë me ulje të theksuar buxhetin e shtetit, sepse parashikimi që kish bërë në fillim të vitit për të ardhurat kishte qenë, si zakonisht, tejet optimist. Por treguesit e publikuar së fundmi nga Ministria e Financave në lidhje me realizimin e të ardhurave, tregojnë se edhe parashikimi i qethur mirë në korrik rrezikon të mos realizohet. Kështu, deri në fund të nëntorit, në buxhetin e shtetit është arritur të mblidhen rreth 295 miliardë lekë, nga 344 miliardë lekë që janë parashikuar deri në fund të vitit. Pra, duhet që vetëm gjatë muajit dhjetor të mblidhen plot 49 miliardë lekë, në mënyrë që qeveria të arrijë parashikimin modest të të ardhurave të këtij viti.

Por ç’na tregon përvoja e viteve të shkuara? Gjatë muajit dhjetor të vitit 2010, u mblodhën gjithsej 31.5 miliardë lekë në thesarin e shtetit. Pra, i bie që këtë dhjetor qeveria duhet të mbledhë 17.5 miliardë lekë (56%) më shumë të ardhura se në dhjetorin e kaluar, që të realizojë parashikimin. Ose, po ta bëjmë krahasimin me dhjetorin e 2009-ës, i bie që këtë dhjetor qeveria duhet të mbledhë 17 miliardë lekë (58%) më shumë të ardhura se në dhjetorin e parvjetshëm, që të realizojë parashikimin. E pamundur!

E.Zaloshnja