Kush është Simone Farina? Çfarë mendojmë në të vërtetë për të?

Ka kohë që në Itali, por edhe në gjithë botën e futbollit, flitet për një futbollist italian 29 vjeçar. Deri para ca javësh nuk e njihte askush. Luante, dhe luan akoma, me Gubbio-n, një skuadër e serisë B në kompeticionet italiane të futbollit. Quhet Simone Farina.

Çfarë ka ndodhur? Simone Farina i ka thënë ‘jo’ një tentative të të tjerëve për ta korruptuar e për ta tërhequr në një lodër të pistë të ndryshimit të rezultatit të ndeshjes. Refuzoi 200 mijë euro. Jo vetëm kaq. Ky futbollist ka bërë denoncimin e shokëve pas ndeshjes, e si rezultat i hetimeve të mëtejshme, është zbuluar një rrjet i tërë kriminal që bënte trukimin e ndeshjeve me synim përfitimet e shumave të mëdha. Prandelli, trainer i kombëtares, e thirri në grumbullimin e kombëtares për ca ditë, dhe ky ishte një gjest simbolik mirënjohjeje e vlerësimi për të. Ndërsa sot, në  galànë e Topit të Artë, ishte  Joseph Blatter, që hapi ceremoninë duke e ftuar në skenë italianin e famshëm për një veprim jo të zakontë në botën e sportit, ku ata që refuzojnë ofertat korruptive janë të shumtë, por ata që denoncojnë shokët e korruptuar janë të rrallë. Simone Farina u shpall ambasadori i FIFA-s për ‘fair play’-in.

Është disi e pakuptueshnme pse kjo ngjarje nuk ka gjetur jehonën e duhur në shtypin shqiptar. A mos vallë për shkak të standardeve tona morale, të cilat na bëjnë që njerëz të tillë t’i quajmë spiunë e hafije?

M.N.