F. Kongoli: Në Prishtinë më kanë kuptuar më mirë se sa në Tiranë

Fatos Kongolit i kanë dhënë në Prishtinë çmimin e letërsisë me emrin ‘Rexhai Surroi’ (Për ata që nuk janë familjare me këtë emër, ka nevojë për një informacion: Rexhai Surroi është një diplomat, gazetar dhe shkrimtar kosovar; i biri, Veton Surroi, e ka themeluar këtë çmim në nderim të të atit).

Kongoli nuk ka qenë i pranishëm në ndarjen e çmimit, por i ka përshëndetur për këtë vlerësim me një letër, në të cilën veçon me mirënjohje kritikën e publikun kosovar, që e kanë mbështetur edhe në rrethanat, kur Kongoli ka qenë rishtar në letërsi (“Romani ‘Ne të Tre’, i publikuar 25 vjet më parë, është pritur shumë mirë në Kosovë, e kaloi pa u ndjerë në Shqipëri”, thotë ai), edhe në rrethanat kur Kongoli e ka parë vetën të sulmuar në Tiranë. Me këtë të fundit, me siguri ka në mendje valën e sulmeve për librin Iluzione në Sirtar, për “romanin e romaneve të veta” (kështu e cilëson ai), për të cilin ka marrë dhe çmimin Rexhai Suroi. “Në Shqipëri, ç’është e vërteta, libri u bë shkak i sulmeve të egra dhe fyese ndaj meje”, thotë ai, duke reaguar kështu për herë të parë ndaj të gjitha gjërave të thëna në adresë të librit e të autorit. E vërteta është se janë thënë dhe fjalë të mira, sidoqoftë.

Re.Pu.