Ekspertët: Video-përgjimi i bisedës Meta-Prifti nuk është autentik

Tre ekspertët shqiptarë, të cilët u zgjodhën nga Gjykata e Lartë për të vlerësuar autenticitetin e bisedës Meta-Prifti të regjistruar nga ky i fundit, kanë arritur në përfundimin e tyre, se video-përgjimi nuk është origjinal. Ky ishte një përfundim i pritshëm pas rrëzimit të ekspertizës së kryer nga amerikanët, e në këtë kuptim nuk ka befasuar askënd.  

Ekspertët e kanë dorëzuar sot në Gjykatën e Lartë ekspertizën e tyre për video-përgjimin Meta-Prifti, në të cilën ata, konkretisht Ardian Pollo, Ermal Beqiri si dhe Artur Rrahmani, kanë veçuar faktet që gjatë bisedës nuk është regjistruar ora e saktë dhe që në orën e paraqitur në video nuk kanë gjetur materialin origjinal. Më tej, pasi kanë egzaminuar orën-kamera, lap-top-in dhe USB-në e dorëzuar nga Dritan Prifti, nënvizojnë, se mundësia për ndërhyrje në video është e madhe, pasi edhe materiali ka shumë zhurma të cilat nëse hiqen, fshihen edhe fjalët. Sipas tyre, video nuk është autentike, por e manipuluar, dhe biseda nuk është regjistruar nga ora e zyrës së Priftit.

Në këto rrethana, do duhet të hapet një çështje në ngarkim të Dritan Priftit, i cili – kështu thonë ekspertët e Gjykatës sonë të Lartë – ka falsifikuar gjithçka. Në këtë kuptim, procesi nuk mund të quhet i mbyllur. Pritet reagimi i Priftit, i cili ka lënë të kuptohet se ka dhe materiale të tjera komprometuese.

Re.Pu.