PS fiton në Korçë me 10 mijë vota diferencë. E majta merr edhe komunën Karbunarë

Ashtu siç pritej, kandidati i Partisë Socialiste, Sotiraq Filo ka fituar me rezultat të thellë zgjedhjet për Bashkinë e Korçës. Diferenca është mbi 10 mijë vota.

Filo fitoi me 15953 vota ndaj 5283 të rivalit të tij, Sotiraq Stratobërdha.

Procesi i numërimit të votave, i cili nisi mbrëmë rreth orës 22:00, shkoi kryesisht mirë dhe nuk pati vonesa, me përjashtim të një rasti ku u gjetën tre fletë të palosura nga i njëjti person, megjithatë u vendos që ato të numërohen.

“Sipas përcaktimeve të Kodit Zgjedhor, KZAZ-të përkatëse miratojnë me vendim tabelën përmbledhëse të rezultatit përfundimtar të zgjedhjeve të pjesshme, duke shpallur dhe kandidatin fitues për secilën zone zgjedhore”, bëri të ditur KQZ.

“Zbatimi rigoroz i të gjitha procedurave zgjedhore nga hapja e qendrave të votimit, tek dorëzimi i materialeve zgjedhore nga KQV-të në dy KZAZ-të dhe numërimi i kutive të votimit, solli një proces zgjedhor transparent, korrekt dhe me standarde. Në këto zgjedhje të pjesshme Komisioni Qendror i Zgjedhjeve përdori të gjitha kapacitet njerëzore, logjistike dhe financiare për organizimin, zhvillimin dhe përmbylljen e procesit zgjedhor të 3 nëntorit me sukses”, tha KQZ-ja.

Partia Socialiste ka fituar edhe në zgjedhjet lokale në komunën Karbunarë në qarkun Fier.

Kandidati Mynyr Shehu ka marrë 864 vota, ndërsa kandidati Bektash Nexha ka marrë 1173 vota.

Tema