Korrupsion edhe në ditët e Qametit. Çfarë po financohet në Ukrainë?

Tashmë lajmi kryesor nga fronti ukrainas nuk ka të bëjë me luftimet, planin e paqes së propozuar nga Donald Trump, apo kapjen e ndonjë qyteti dhe sulmet me dronë. Ka të bëjë me korrupsionin. Numri dy i qeverisë së presidentit ukrainas, Volodymyr Zelenskiy, këshilltari presidencial, Andriy Yermak, 54 vjeç, është dorëhequr pas një kontrolli në banesë nga agjencitë ligjzbatuese.

Në përgjimet e shumta ai përmendet si Ali Babai, mandej si “Kardinali” e kështu me radhë, ndërkohë që përgjegjësia shkon pak më lart: sipas raportimeve të ndryshme në media, vitin e shkuat Zelenskiy bëri çmos ta mbronte këshilltarin e vet edhe me një ligj të posaçëm me kufizimin e pushtetit të agjencive antikorrupsion.

Në fund Zelenskiy është detyruar të pranojë largimin e këshilltarit të tij. Kjo që ka ndodhur krijon një pështjellim të madh mbi atë se çfarë është sot siguria e Europës, me çfarë lidhet ky koncept në të vërtetë dhe se cili është qëllimi i luftës.

Nëse koncepti i sigurisë ka të bëjë me territorin, atëherë ngjan se një farë legjitimiteti ekziston dhe është real. Por nëse pranimi i Ukrainës në BE, si proces i inaugurimit të sigurisë, nuk konsideron korrupsionin si problem, atëherë diskutimi është krejt tjetër.

Financimi me miliarda i një lufte  që është trumbetuar se është luftë e drejtë dhe e një rezistence heroike, tingëllon absurd jo për shkak të një episodi korrupsioni, por për faktin se atë linjë korrupsioni e ka mbrojtur gjatë dhe Zelenskiy, i brohoritur si heroi i ditëve tona.

Akte korrupsioni janë verifikuar edhe nga pala ruse, por në dallim nga Ukraina, Rusia nuk përpiqet sot për mbijetesën.

Ukraina është një gropë e zezë parash nga mbarë bota, e cila është shumë më e thellë dhe e ndotur se i gjithë pretendimi për luftë patriotike. Një korrupsion i këtij niveli vë në krizë dhe diskutim narrativën konvencionale pushtues-pushtim-të pushtuar, pasi loja kryesore që po zhvillohet është mes atyre që fitojnë dhe atyre që janë viktima. Ka edhe një palë të tretë: Europa që shet moralin e vjetër të dinjitetit dhe nderit.

s.zaimi