Tatimi progresiv, i Spiro Kolekës apo i Sali Berishës?

Në konferencën e sotme për shtyp, Berisha, ndër të tjera, tha se, idenë e tatimit progresiv, Rama e ka kopjuar nga Spiro Koleka. Por ka një problem me këtë deklaratë të Berishës – në kohën e Kolekës tatimi ishte i sheshtë, njësoj për të gjithë; quhej e ardhura e centralizuar e shtetit. Ndërsa kur erdhi Berisha për herë të parë në pushtet, firmosi një ligj që shenonte kalimin nga tatimi i sheshtë në tatimin progresiv. Në datën 14 korrik 1992, Presidenti Berisha firmosi ligjin 7585, sipas të cilit, tatimi mbi të ardhurat personale do te ishte progresiv, me shkallëzim 10%, 20% e 30%.
E.Zaloshnja

Teksti i ligjit 7585:

PER TATIMIN MBI TE ARDHURAT PERSONALE

Date 14.07.1992

Në mbështetje të nenit 16 të ligjit nr. 7491, datë
29.4.1991 "Për dispozitat kryesore kushtetuese", me propozimin e
Këshillit të Ministrave,

KUVENDI POPULLOR
I REPUBLIKES SE SHQIPERISE

V E N D O S I :

Neni 1

Personat fizikë, vendas e të huaj, që realizojnë të ardhura
personale në territorin e Republikës së Shqipërisë, detyrohen të
paguajnë tatim.
Person fizik i huaj për efekt të pagimit të tatimit
konsiderohet personi që ushtron veprimtari ekonomiko-tregtare në
vazhdimësi në territorin e Republikës së Shqipërisë për një
periudhë mbi 183 ditë gjatë një viti tatimor.

Neni 2

Tatimi mbi të ardhurat personale vendoset mbi këto kategori
të ardhurash:

1. Të ardhurat nga pagat.

2. Të ardhurat nga shpërblimet që realizohen nga shërbimet
personale, që kryhen për llogari të të tretëve.

3. Të ardhurat nga e drejta e autorit dhe dividendët.

4. Të ardhurat nga llogaritë dhe konkurset parashikuese.

5. Të ardhurat e tjera që përcaktohen si të tatueshme nga
Ministria e Financave dhe e Ekonomisë.

Neni 3

Nga tatimi mbi të ardhurat personale përjashtohen :

1. Dhuratat dhe trashëgimitë

2. Të ardhurat që paguhen nga Instituti i Sigurimeve për
rastet e aksidenteve dhe të vdekjeve.

3. Të ardhurat nga Sigurimet Shoqërore për raportet e pa-
aftësisë së përkohëshme, të leje e barrëlindjeve dhe pensionet.

4. Bursat e nxënësve dhe studentëve.

5. Të ardhurat për mbulimin e shpenzimeve të transferimit
dhe për udhëtim e dieta si dhe shpenzimet për investime.

6. Të ardhurat që përfitohen nga përdorimi i fondit të
ndihmës sociale.

7. Të ardhurat nga interesat e depozitave të kursimit të
shtetasve.

8. Të ardhurat nga asistenca sociale.

9. Të ardhurat e tjera që përcaktohen si të patatueshme nga
Ministria e Financave dhe e Ekonomisë.

Neni 4

Nga tatimi mbi të ardhurat personale përjashtohen të ardhura
që rrjedhin nga pagat deri në 2500 lekë në muaj.

Neni 5

Të ardhurat nga pagat mbi 2500 lekë në muaj tatohen si
vijon:

1. Kur paga mujore është 2501-2500 lekë, shuma mbi 2500 lekë tatohet 10 %.

2. Kur paga mujore është 3001-3500 lekë, shuma nga 2501 deri në 3000 lekë tatohet 10 %, kurse shuma nga 3001 deri në 3500 lekë 20 %.

3. Kur paga mujore është 3501 lekë e lart, shuma 2501 deri 3000 lekë tatohet 10 %, kurse shuma nga 3001 deri 3500 lekë tatohet 20 % dhe shuma 3500 lekë e lart tatohet 30 %.

Neni 6

Të ardhurat që përfitohen sipas pikave 2, 4 dhe 5 të nenit 2
tatohen 20 %, ndërsa të ardhurat sipas pikës 3 tatohen 10 %.

Neni 7

Tatimi mbi të ardhurat personale për punonjësit në
marrëdhënie pune me shtetin ose me ndërmarrjet me pjesëmarrjen e
kapitalit të huaj llogaritet nga dega e financës për çdo muaj dhe
derdhet në buxhetin e shtetit në të njëjtën kohë me tërheqjen e
pagave.

Neni 8

Punëdhënësit privatë detyrohen të regjistrojnë pagat e të
punësuarve, të ndalin tatimin dhe ta derdhin atë në buxhetin e
shtetit në të njëjtën kohë me dhënien e pagave.

Neni 9

Banka detyrohet të vërtetojë, në momentin e tërheqjes së
pagave të punonjësve, ndalesat dhe derdhjet në buxhetin e shtetit
të tatimit mbi të ardhurat personale.

Neni 10

Të ardhurat personale që rrjedhin nga burimet e parashikuara
në pikat 2, 3, 4 dhe 5 të nenit 2 të këtij ligji, llogariten mbi
bazën e deklaratës personale.

Neni 11

Quhen shkelje të ligjit :

1. Fshehja dhe falsifikimi i të ardhurave personale.

2. Mosevidencimi i të ardhurave personale.

3. Moskryerja e ndalesave dhe e derdhjeve të tatimit mbi të
ardhurat personale.

4. Mosdhënia ose dhënia e deklaratës me vonesë.

Neni 12

Për shkeljet e parashikuara në nenin 11 të këtij ligji, kur
nuk përbëjnë vepër penale, merren këto masa:

1. Për rastet e parashikuara në pikën 1 të nenit 11 të këtij
ligji, personat fajtorë dënohen me gjobë në masën 5-fish të
shumës së tatimit të fshehur.

2. Për rastet e parashikuara në pikat 2, 3 dhe 4 të nenit 11
të këtij ligji, personat fajtorë dënohen me gjobë nga 1000 gjer
në 5000 lekë.

Neni 13

Të drejtën e gjobës e kanë inspektorët e tatimeve në komunë,
bashki e rrethe dhe punonjësit e Drejtorisë së tatimeve në Minis-
trinë e Financave dhe të Ekonomisë.
Kundër vendimit të dënimit me gjobë mund të bëhet ankim,
brenda 5 ditëve nga data e njoftimit, përkatësisht te kryetari i
zyrës së tatimeve e taksave në komunë e bashki, te kryetari i
degës së tatimeve e taksave në rreth dhe te drejtori i Drejtorisë
së tatimeve në Ministrinë e Financave dhe të Ekonomisë, akti i të
cilëve është i formës së prerë.

Neni 14

Ky ligj hyn në fuqi 10 ditë pas shpalljes së tij.

Tiranë, më 14.7.1992
Nr. i ligjit: 7585
Shpallur me dekretin nr.263, datë 20.7.1992 të Presidentit të Republikës së
Shqipërisë, Sali Berisha.