Blloku Bota

Europa ka nisur përpjekjet për të shpëtuar nga varësia e gazit rus. Për këtë, synimi është zhvillimi i kapaciteteve që bazohen në energjinë e rinovueshme dhe të diversifikimi i furnizimit me gaz për t'i dhënë fund varësisë së saj nga gazi rus. Detajet dalin në një draft të komunikimit të BE-së mbi çmimet e energjisë, në të cilin EURACTIV ka pasur qasje.

Ministrat e Jashtëm të Libisë, Hafez Gaddur, ish-ambasadori i Libisë në Itali, dhe ai i Arsimit, Salha Al Daraëqui, dyshohet se janë rrëmbyer teksa po transferoheshin nga Misurata në Tobruk, ku ishte planifikuar ceremonia e betimit të qeverisë së re të Fathi Bashaga.

Lajmi bëhet i ditur nga disa media libiane, sipas të cilave, autokolona e makinave është gjetur në mes të një sulmi me armë zjarri zjarri mëngjesin e sotëm. Hapësira ajrore libiane është mbyllur për momentin.

Dëshirë e Amerikës për të dominuar Europën, si dikur Napoleoni apo Hitleri. Kështu e quajti ministri i Jashtëm rus, Sergei Lavrov, qasjen e SHBA-ve në raport me kontinentin e vjetër dhe me Rusinë.  Në një konferencë shtypi me gazetarë të huaj, Lavrov fajësoi Perëndimin për luftën në Ukrainë, duke shtuar se SHBA dëshiron të dominojë Evropën, si Napoleoni dhe Hitleri.

Dje, presidenti ukrainas, Volodymyr Zelenskiy, deklaroi se deri më tani janë vrarë 6000 ushtarë rus në luftime. Gazeta italiane “Corriere della Sera” fliste për 10 mijë ushtarë rus të vrarë, diçka që jep idenë e një situate alarmante.

Banka qendrore e Rusisë dhe fondi sovran zotërojnë rreth 140 miliardë dollarë në obligacione kineze. Shifra del nga një raport i  Grupit Bankar të Australisë dhe Zelandës së Re, ose ANZ, të cilit i referohet Bloomberg.

Analistët e shohin këtë fond si një “airbag” që mund të përdoret për të zbutur goditjen nga sanksionet e vendosura nga vendet perëndimore ndaj Rusisë pas ndërhyrjes ushtarake në Ukrainë.

Çdo tentativë për të hakeruar satelitët e saj, Rusia do ta shohë si justifikim për luftë. Paralajmërimi vjen nga kreu i agjencisë hapësinore ruse. Kreu i Roscosmos, Dmitry Rogozin, mohoi raportet e mediave se qendrat ruse të kontrollit satelitor tashmë janë hakuar në mes të pushtimit të Ukrainës nga Moska, ndërsa paralajmëroi kundër çdo përpjekjeje për ta bërë këtë, njoftoi agjencia e lajmeve Interfax.

Aviacioni ishte ndër objektivat e parë të sanksioneve perëndimore ndaj Rusisë.

Brukseli filloi relativisht butë, duke ndaluar shitjen e avionëve dhe pjesëve për kompanitë ruse në paketën e parë të masave të miratuara javën e kaluar, por ashpërsia u rrit me intensifikimin e sulmeve në Ukrainë. Deri të dielën, të gjithë avionët rusë - komercial dhe privat - u ndaluan të hyjnë në hapësirën ajrore të BE-së.

Në kundërpërgjigje, Rusia ndaloi linjat ajrore të BE-së - si dhe ato nga çdo vend tjetër me masa të ngjashme - nga qielli i saj.

Shefi i diplomacisë europiane, Joseph Borrell, thotë se situata në Ukrainë duhet t’i shërbejë Europës si mësim. Sipas tij, zhvillimet e fundit në lindje të kontinentit janë momenti që vulos lindjen e Europës gjeopolitike.

Duke folur në një seancë urgjente të Parlamentit Evropian të nxitur nga pushtimi i Ukrainës nga Rusia, Borrell tha se "një nga mësimet që duhet të mësojmë është se më shumë se kurrë Evropa duhet të mendojë në mënyrë strategjike për veten, mjedisin e saj dhe botën".

Përkthyesja televizive e gazetës gjermane Welt shpërtheu në lot ndërsa përkthente fjalimin e presidentit ukrainas, Zelensky. Ajo ndaloi së foluri, më pas kërkoi falje.

Në janar të këtij viti, inteligjenca amerikane paralajmëroi për një sulm ushtarak rus në drejtim të Ukrainës, më 16 shkurt. Gabimi i vetëm në këtë parashikim ishte data. Sulmi rus ndodhi pak ditë pas 16 shkurtit, e megjithatë Perëndimi u gjet i papërgatitur dhe në një dilemë që vijon edhe disa ditë pasi trupat ruse kanë hyrë në Ukrainë.

Perëndimi ka vendosur në kundërpërgjigjet me sanksione, me të cilat synohet dëmtimi i ekonomisë ruse. Por në epokën e globalizmit, sanksionet janë si të pështysh lart dhe të të kthehet në fytyrë.