Blloku Bota

Javën e kaluar, Komisioni Evropian rekomandoi hapjen e bisedimeve zyrtare të pranimit me Ukrainën. Por në Gjermani ka të pakënaqur. Joachim Rukwied, presidenti i Shoqatës Gjermane të Fermerëve (DBV), paralajmëroi për pasojat e tij në sektorin bujqësor.

Sipas tij, pranimi i Ukrainës në BE do të "çonte në shkatërrimin e bujqësisë familjare në Evropë".

Kjo duhet “të mbetet në sfondin e të gjitha diskutimeve politike”, shtoi ai.

Bashkimi Evropian bëhet organi i parë ndërkombëtar që kriminalizon dëmtimin mjedisor në shkallë të gjerë “të krahasueshëm me ekocidin”. Deputetët e PE ranë dakord këtë javë për përditësimin e direktivës së bllokut për krimin mjedisor për ndëshkime më të ashpra të rasteve më serioze të shkatërrimit të ekosistemit, duke përfshirë humbjen e habitatit dhe prerjet e paligjshme.

Direktiva e krimit mjedisor do të miratohet zyrtarisht në pranverë dhe shtetet anëtare do të kenë dy vjet kohë për ta implementuar në ligjet e tyre kombëtare.

Skcio-ja njofton se qeveria skoceze ka publikuar një plan për anëtarësim në Bashkimin Europian. Dokumenti parashikon një Skoci të pavarur dhe teknikisht presupozohet përdorimi i nenit 49 për anëtarësim “të lehtë dhe të shpejtë”.

Megjithatë diskutimi për këtë çështje lidhet me pavarësinë e vendit si dhe implikimet me kufirin anglez dhe pjesëmarrja në një treg të përbashkët. Kryeministri Rishi Sunak ka deklaruar se çështja e pavarësisë së Skocisë u vendos në vitin 2014 me referendumin e atij viti dhe se nuk ka më vend për një referendum të dytë.

Vendimi i Rusisë për të dalë nga Traktati Gjithëpërfshirës i Ndalimit të Testeve Bërthamore, marrëveshja historike e vitit 1996 që krijoi një konsensus global kundër shpërthimeve bërthamore për qëllime ushtarake dhe paqësore, ka ngritur frikën nëse Moska po shqyrton seriozisht rifillimin e testeve të saj bërthamore.

Mbi 100 të tilla, të cilësuara shpërthime bërthamore "paqësore", janë kryer në epokën sovjetike, port ë dhënat për to nuk janë të qarta për shkak të mungesës së monitorimit të vendeve ku shpërthimet nuk shkonin sipas planit.

Shefi i politikës së jashtme të BE-së, Josep Borrell, i ka kërkuar Izraelit të vetëpërmbahet në operacionet kundër Hamasit, të cilat po u marrin jetën civilëve palestinezë të Gazës. Gjatë vizitës së tij të parë në Izrael, Borrell tha se sulmi i 7 tetorit nuk duhet të shërbejë si justifikim për masakra të tjera.

Një nga gjeneralët më të lartë në Britaninë e Madhe dyshohet se fshehu provat se si ushtarët e Shërbimit Ajror Special (SAS) ekzekutonin të arrestuarit në Afganistan. Gjenerali Gwyn Jenkins, i cili është aktualisht oficeri i dytë më i lartë në forcat e armatosura britanike, thuhet se ka marrë raporte të detajuara me shkrim të bisedave midis ushtarëve që përshkruanin vrasjet pa gjyq të afganëve në vitin 2011, pretendon BBC, duke cituar një investigim të programit të saj, Panorama.

Katër muaj krizë politike në Spanjë kanë marrë fund me rizgjedhjen në krye të qeverisë të Pedro Sanchez. 179 parlamentarë kanë mbështetur Sanchez nga 350 vende që ka gjithësej legjislativi spanjoll, mes të cilëve votë pro dhanë edhe shtatë ligjvënës katalanas.

Kundër kanë votuar mbështetësit e Alberto Núñez Feijóo, i qendrës së djathtë që ka marrë 171 vota.

Kina dhe SHBA kanë rënë dakord të rivendosin kanalet e komunikimit ushtarak mes tyre. Kjo është vendosur mes dy presidentëve, Biden dhe Xi Jinping në takimin e tyre në kuadër të samitit të përbashkët mbajtur në SHBA. Të dy krerët e shteteve kanë biseduar për katër orë dhe ndër pikat e dakordësuara është edhe heqja dorë nga Kina e pordhimit të përbërësve të fentanilit që konsiderohet një drogë epidemike në SHBA.

Ka nisur sot në Bruksel raundi i ri i negociatave mes Kosovës dhe Serbisë. Mediat raportojnë se me ndërmjetësinë e Miroslav Lajçak, negociatorët Besnik Bislimi dhe Petar Petkoviç kanë nisur diskutimin dhe bëhet e ditur se Beogradi ka nisur në Bruksel ekipin më të madh të ekspertëve deri më tani që mbulojnë çështje të tilla si Asocacioni, të humburit dhe energjia.

Mediat në Kosovë raportojnë se shqiptarë të ndryshëm me banim në Luginën e Preshevës i janë drejtuar Gjykatës Kushtetuese serbe për të kundërshtuar fshirjen e tyre nga adresari. Në dy dëshmi të deklaruara pranë mediave flitet për një veprim që duket i qëllimshëm nga autoritetet serbe për shkak se banorët thonë se nuk janë larguar nga vendi.

Jam gati të shkoj deri në Strasburg

citohet një shqiptare e Serbisë Jugore.