Çmimi i karburantit në tregun shqiptar është ulur me 20%, por ai sërish nuk reflekton raportin e tregut ndërkombëtar, ku çmimi ka rënë me katër herë. “Tema Tv” raporton se një arsye për këtë ngrirje të çmimit të lartë për konsumatorin shqiptar janë taksat e larta, që aktualisht i leverdisin edhe qeverisë, që merr jo pak të ardhura në këtë fushë. Dhe duket se në këtë drejtim nuk do të ketë lehtësi.

Emill Dimitriev do të jetë kryeministri i ri i Republikës së Maqedonisë. Ai mban detyrën e sekretarit të Përgjithshëm të VMRO-DPMNE dhe vjen në detyrë pas dorëheqjes së Nikolla Gruevskit. “Sipas Marrëveshjes së Përzhinos, kryeministri duhet të tërhiqet 100 ditë përpara zgjedhjeve që zgjedhjet të jenë efektive, ndërkaq ai ka të drejtë përsëri të kandidojë për kryeministër në zgjedhjet e parakohshme parlamentare. Me dorëheqjen e kryeministrit mbajtja e zgjedhjeve të jashtëzakonshme parlamentare të 24 Prillit janë vulosur, ndryshe Gruevski nuk do të dorëhiqej”, raporton “Zhurnal”.

Koordinatorët socialistë të qarkut Shkodër dhe Lezhë kanë qenë sot në një takim me kryeministrin Edi Rama, njëkohësisht kryetar i asaj që ka mbetur nga Partia Socialiste. Rama është pyetur nga gazetarët se kur do të zhvillohet kongresi i PS-së, por zotëria me duar në xhepa, është përgjigjur se kjo pyetje u “lejohet” vetëm anëtarëve të partisë. Një përgjigje prej karagjozi, në një parti ku të gjithë janë kthyer në vuvë e ku bilbilojnë ca ministra bashkë me këtë liderin e zhgarravinave, siç i quan pikturat e tij.

Shteti Islamik mori përsipër sulmet e koordinuara me eksplozivë dhe armë në Xhakarta, kryeqytetin e Indonezisë, vendi me popullësinë më të madhe myslimane në botë.Të paktën dy civilë, një indonezian dhe një kanadez si dhe pesë militantë u vranë gjatë sulmeve, më të rëndat prej vitit 2009, që u përshkruan si imitim i atyre të 13 Nëntorit, në Paris.

Kryeministri Edi Rama ka caktuar ministrin e Shëndetësisë, Ilir Beqja, si koordinator për vlerëismin e punës së qeverisë në këto gati tre vjet pushtet të mazhorancës së majtë. Burime nga qeveria bëjnë me dije se Beqja është caktuar të kontaktojë me këshilltarë të ministrave për të tërhequr raportimet e tyre për çdo dikaster e mandej do t’ia dorëzojë kryeministrit. Nuk dihet cili është synimi i këtij raporti tërësor, por para disa muajsh një email i publikuar në media, nxirte vlerësimin e Ramës për ministrat e tij.

Gazeta “Sot” ka publikuar një dokument që paraqet një kërkesë të kreut të komisionit Xhafaj,  drejtuar fondacionit “Soros” ku i kërkohet mbështetje për reformën në drejtësi.

Në pikën dy të kësaj kërkese shkruhet: Të përgatitet dhe nënshkruhet memorandumi i bashkëpunimit mes Komisionit të Posaçëm dhe Fondacionit Soros  që do të përcaktojë në mënyrë të detajuar termat e referencës së këtij bashkëpunimi.

Edi Rama është shfaqur sot në një intervistë për “Top-Channel” ku ka deklaruar edhe njëherë se “çdo gjë shkon për bukuri”. Duke i konsideruar normale dikustimet dhe kundërshtimet për një reformë historike, siç tha ai, Rama ka nënvizuar se ideja e referendumit nuk mund të përjashtohet a priori. Më poshtë një pjesë e intervistës:

TCH: Zoti kryeministër, mbrëmjen e djeshme dhe paraditen e sotme keni zhvilluar takime me aleatin tuaj, Ilir Meta. Cilat janë çështjet që ju ndajnë apo ju bashkojnë për reformën në drejtësi?