Fshat turistik “socialist” në Hudënisht? Akuzon PD, kundërpërgjigjet selia rozë: Fantazira, do ketë vetëm parqe e pemë

Çfarë “fshihet” pas prishjeve të ndërtimeve në vijën buzë ujit në Hudënisht të Pogradecit? Sipas Partisë Demokratike, shembjet në Hudënisht e më gjerë po bëhen me qëllimin për t’i hapur vend, ndërtimit të fshatit turistik të deputetit socialist Ilir Xhakolli. Deklaratën e ka bërë para mediave deputeti i PD-së Gjergji Papa, sipas të cilit një vendim për përdorim toke në sipërfaqe 4.5 ha për Xhakollin, është vetëm hapi i parë për një fshat turistik, duke prishur kështu 53 ndërtime të banorëve të zonës.

Nga ana e saj Partia Socialiste deklaroi se ndërtimet që po prishen në vijën liqenore të Pogradecit do të zëvendësohen me parqe dhe pemë dhe jo me fshatra turistikë. “Çmenduria e Partisë Demokratike nuk ka fund, – tha sot deputetja Blerina Gjylameti nga selia rozë. – E duket se viti i ri e ka zënë opozitën edhe më keq se 2014. Më shumë gënjeshtra, më shumë shpifje. Akuzojnë sot deputetin e Partisë Socialiste se gjoja do ndërtoka fshat turistik m’u aty ku po prishen ndërtimet e shpronësuara në vijën liqenore të Pogradecit, por e vërteta është se ndërtimet po prishen jo për të ndërtuar fshatra turistike, por për ta kthyer hapësirën publike tek qytetarët, për të mbjellë më shumë pemë, më shumë parqe”.

a.k