Policia i kalon në heshtje dy atentatet në Tiranë. Të përfshirë emra të njohur të botës së krimit

Ngjarjet e së hënës në kryeqytet ku mbeti vrarë 1 person dhe u plagosën 3 të tjerë u shoqëruan ne konfuzion në media si për rrethanat e dy atentateve ashtu dhe për emrat e përfshirë në këto ngjarje kriminale.

Raportimet në media ishin nga burime jo zyrtare dhe nuk dhanë asnjë panoramë të qartë të dinamikës së dy atentateve. Për vetë peshën e këtyre ngjarjeve që tronditën qetësinë e kryeqytetit pas festave, policia duhet të mbante një qëndrim transparent dhe sqarues për publikun dhe median. Por ajo nuk dha asnjë detaj, qoftë edhe paraprak  për atë çfarë ka ndodhur në mes të Tiranës.

Në kushtet e mungesës së informacionit nga policia mediat kanë dhënë versione të ndryshme mbi ngjarjet, duke fshirë e korrigjuar emrat e personave të dyshuar si autorë si dhe viktimës apo të plagosurit.

Është e disata herë që policia i kalon në heshtje ngjarje të tilla ku protagonistë janë emra të përfolur të krimit dhe të skeduar për disa vepra kriminale, ndërsa nuk ka nguruar të dalë në konferenca shtypi për ngjarje të rëndomta.

l.m