Rama në Bukuresht i kërkon kryeministrit Victor Ponta që Rumania ta njohë Kosovën

Gjatë një vizite zyrtare që po zhvillon këtë të premte në Rumani, kryeministri Edi Rama ka kërkuar që Rumania ta njohë Kosovën. Në vizitën e tij Rama u prit në një takim nga homologu, Victor Ponta. Pas takimit, dy kryeministrat dolën në një konferencë për shtyp, prej nga ku Rama, duke vlerësuar se Rumania është një vend mik i yni, shtoi se niveli i marrëdhënieve dhe i bashkëpunimit mes dy qeverive është shumë i mirë. Rama shprehu mirënjohjen për Rumaninë për mbështetjen që ky vend, anëtar në Bashkimin Europian po jep në procesin e integrimit në familjen europiane. Nga ana e tij, Ponta shprehu vendosmërinë për mbështetje edhe në të ardhmen në procesin e integrimit të Shqipërisë. Në deklarimin e tij, Rama theksoi se i kishte ripërsëritur homologut rumun edhe kërkesën e vazhdueshme të Shqipërisë që Rumania më në fund ta njohë Kosovën.

l.v