Gjekmarkaj del me një optikë ndryshe për çështjen “Doshi”: "Nuancë gegofobe. Paraardhësit e Doshit, personazhe të “Lahutës së Malcis”, arsye e mbështetjes së tij”

Çështjes “Doshi” i ka kushtuar sot një shkrim në gazetën “Panorama” edhe Agron Gjekmarkaj. Në ndryshim nga komentet e deritanishme që e vendosin temën e trajtuar në kontekstin e kriminalizimit të politikës, Gjekmarkaj ndalet te një aspekt që për të thënë të vërtetën bëhet sikur harrohet në Shqipëri. Ky është raporti krahinarist në goditjet që aplikon politika, por që në këtë rast Gjekmarkaj kujdeset që t’i evidentojë si ndër kryesoret në sjelljen e PS-së. “...janë shfaqur edhe nuanca gegofobe, duke ditur se PS-ja habitatin e saj social dhe ideologjik e ka në jug të vendit, duke përfituar edhe nga akuzat e Doshit “për financime vetëm në jug”, shkruan Gjekmarkaj që kërkon me çdo kusht reminishenca edhe aty ku ka vetëm interesa, apo edhe atje ku luajnë aktorë që nuk kanë skrupuj të kësaj natyre. Për më tepër, përveç veteranëve(jo të gjithë), në Jug, askush nuk e di se cila është vija ideologjike e PS-së, e cila në rastin më të mirë, katandiset te naivët si iluzion i vazhdimit të etatizmit të dikurshëm, apo te me të nevrikosurit reduktohet thjesht në shprehje të antiberishizmit. Më e habitshme është se për të hedhur këto teza, opinionisti Gjekmarkaj i drejtohet një habitati të pangjyrë dhe paideologji: Kafeneve të Tiranës. “Nuanca tejet të shëmtuara janë ato të cilat në kafenetë e Tiranës artikulohen si “teza qytetërimore” të nxitura nga rasti Doshi kundër malokëve...”, shkruan autori në fjalë. Epilogu është një përlavdim befasues që nis me analogjinë e rastit Doshi me atë të Pjerin Kçirës “kallauzi i Sigurimit që futi armë në godinën e Kishës Katolike”, ku Doshi këtu “është Kisha", për ta vijuar me gjenealogjinë e trungut prej nga rrjedh z. Doshi. Gjekmarkaj i referohet Lahutës së Malcis, ku personazhe të saj sillen me cilësitë e paraardhësve biologjikë të Tom Doshit: “Luftëtarë të pavarësisë kombëtare si Turk Shabi e Uc Shabi janë të familjes së tij...këtu mbase do kërkuar edhe mbështetja që Tom Doshi ka patur gjatë këtyre viteve...”, shkruan Gjekmarkaj. Të gjitha interpretime që konfirmojnë një paragjykim serioz ndaj PS-së, njësoj si paragjykimi që Gjekmarkaj i mvesh elitës së kësaj partie në raport me Veriun. Janë gjithsesi instruktive këto opinione sa kohë ato nuk mund t’i gjejë askush në librat e shkollës, mund t’i hasë më pak në kthinat e lagjeve, por kaq sistematike, të kthyera në kriter të monitorimit permanent të çdo situate, pakkush ka fatin që t’i njohë.
s.z