Luan Rama: “Me çështjen “Doshi” donin të destabilizonin vendin. Situatë e ngjashme edhe në Serbi. Duhen hapur dosjet që nga 2 prilli”. Përmendet edhe Olldashi

Një nga drejtuesit e Lëvizjes Socialiste për Integrim, Luan Rama, ka hedhur sot në emisionin “Opinion” një tezë politike që mëton të shpjegojë arsye që mund të qëndrojnë pas inicimit të çështjes “Doshi”. Rama ka apeluar që situata në Shqipëri të vihet në kontekstin rajonal duke parë se kush po protteston sot edhe në rajonin ballkanik. “Kush proteston sot kundër reformëve europianizuese? Sheshli në Serbi që proteston kundër reformave të kryeministrit Vuçiç, Agimi i Artë në Greqi dhe Partia Demokratike në Tiranë. Kam bindje se ka qarqe antishqiptare në rajon, që duan të godasin pikërisht procesin e reformave dhe klimës së re të krijuar në Ballkan”, tha Rama. Sipas tij kërkesa për dorëheqje të Ilir Metës dhe apeli për revolucion demokratik shkon pikërisht në sens të destabilizimit të Shqipërisë. Luan Rama madje nuk ka munguar me mesazhe të forta: “Dekomunistizimi dhe dekriminalizimi nuk bëjet me akuza dhe protesta, por duke trajtuar të gjitha dosjet që nga 2 prilli e deri më sot”, tha ai. Rama është konfrontuar edhe me përfaqësuesen e PD-së, Grida Duma, që mori shkas nga një shkëmbim batute. Nuk është shumë e qartë se çfarë ka dashur të thotë Luan Rama, por ai i është drejtuar Dumës duke i kujtuar Bankën “Credins” dhe madje, në nerva e sipër ka përmendur edhe frazën “edhe ai që u akuzua për vrasjen e Sokol Olldashit”. Por mbetet diçka që nuk kuptohet se për çfarë është fjala.