Kauza e legalizimit të hashashit, gazeta e Kokëdhimës: “Jemi ne të zgjuarit e kësaj bote, apo më budallenjtë…dhe si në fjalën e popullit “dhi e zgjebosur dhe bishtin përpjetë””

Koço Kokëdhima nuk ka ndërmend të heqë dorë nga kauza e tij e Hashashit. Ndonëse kryeministri deklaroi para disa ditësh në “Opinion” se legalizimi i hashashit nuk do të ndodhë, apo edhe pasi ministri i Brendshëm, përsëriti dje thuajse të njëjtën gjë, sërish sot, gazeta e Kokëdhimës, “Shekulli”, boton një opinion të Arben Rrozhanit, që në të vërtetë luan rolin e një zëdhënieje të asaj që mendon Kokëdhima në këtë rast. Kjo sepse Rrozhani merr thëniet e deputetit, i vë ato në referencë me trajtimin e kësaj teme në botë dhe përfundon se mendimi i deputetit për legalizimin e hashashit është shumë pozitiv. Madje, ky akt është, sipas gazetarit në fjalë, premisë e një aveniri që Kokëdhima po i propozon Shqipërisë. Dhe ky është shembulli shtetit të Kolorados. “Shqipëria e nesërme që propozon deputeti Kokëdhima mund të jetë ai model që po përflitet në të gjithë botën: shteti amerikan i Kolorados, me rreth 5.3 milionë banorë, me sipërfaqe 10 herë më shumë se Shqipëria dhe me të ardhura për frymë rreth 12 herë më shumë se Shqipëria e varfër, rreth 52 mijë dollarë amerikanë”, thotë Rrozhani. Më herët Kokëdhima ka folur për nevojën e zbutjes së krizës ekonomike, sidomos asaj në fshat, duke shtuar edhe nevojën e “zbutjes së klimës kritike që ekziston ndaj kësaj çështjeje”. Dhe me këtë gazetari që publikon sot opinion rikujton rëndësinë ekonomike të lëndës së parë ekskluzive të Shqipërisë. “Nëse sot kundërshtarët e kësaj ideje që është bërë realitet në 24 shtete amerikane apo disa vende europiane fërkojnë duart të ngazëllyer nga e ashtuquajtura “luftë deklaratash” kundër Kokëdhimës, le të hedhin sytë se çfarë ngjet nëpër botë dhe pastaj të bëjnë llogaritë se jemi ne të zgjuarit e kësaj bote, apo më budallenjtë, gjithnjë të vonuar dhe si në fjalën e popullit “dhi e zgjebosur dhe bishtin përpjetë””. E parë ftohtë dhe me një sens praktik, këmbëngulja e Kokëdhimës për ringritjen e hashashit shkon në dy drejtime: së pari, mund të spekulojmë për një projekt të tijin për të qenë investitor në një ekonomi legale të nesërme dhe së dyti, propozimi konfirmon se qeveria nuk ka ndonjë plan, projekt, ide, apo variant zhvillimi për bujqësinë. Nga kjo pikëpamje, ideja mund të ketë vlerë, ndonëse politikisht ajo zhbën vlerën e suksesit real që qeveria arriti me goditjen e Lazaratit.
s.z