Një testim i rëndësishëm para ardhjes në pushtet

Edi Rama, pas disa vitesh eksperimentim me forma të ndryshme organizative, duket se është kthyer në atë më klasiken:  organizim në çdo qytet e në çdo lagje, duke u zhvendosur kësisoj nga një parti elektorale e cila ka funksion vetëm zgjedhor, në një komunitet politik kapilar, i cili jo vetëm prek çdo qelizë të vendit por edhe e organizon atë politikisht gjithashtu. Kjo mënyrë i krijon jo vetëm frymëmarrjen e duhur një partie që pas një viti do jetë në krye të punëve të vendit, por mbi të gjitha aktivizon çdo qelizë të saj: cilido anëtar është një organizator dhe anasjelltas.

Strategjia e prezantuar nga socialistet në asamblenë e të premtes është më shumë se organizim partiak: e bën thyerjen në realitet në dy dimensione shumë të rëndësishme. Së pari, programi “Për një Rilindje Shqiptare” -(shenjon një nga momentet e vetme serioze të majta të një partie të majtë gjatë këtyre 22 viteve pluralizem) - nuk do të shkojë tek shqiptarët nëpërmjet zërit të spikerave në lajme apo spoteve televizive, por nëpërmjet zërit të.. fqinjit përballë. Kjo formë që e transformon qytetarin në një agjent të ndryshimit, ne gjykimin tim është një hap shumë i rëndësishëm për PS, sepse i jep anëtarit armën e dijes dhe përfshirjes, duke e bërë atë jo vetëm kontribues në ndërtimin e programit politik të partisë, por mbi të gjitha mbartës të saj. Nesër, me ardhjen e socialistëve në pushtet ka për të qënë shumë e vështirë për “borgjezinë” e partisë devijimi nga rruga e këtij programi, si pasojë e presionit që do vijë nga poshtë, në rradhë të parë nga vetë antarësia e partisë.
Dimensioni i dytë që kontribuon në shoqëri kjo strategji e re është zhvendosja për herë të parë në historinë e Shqipërisë nga varësia e medias. Raporti pervers që ka ekzistuar këto vite ku politikani prodhon median e media më pas prodhon politikanin, duke e lënë popullin jashtë këtij ekuacioni, tronditet kësaj here. Patjetër që jo vetëm me dëshirën e socialistëve, por mbi të gjitha me represionin e ri që po ushtrohet nga S.B. në çdo medium, kushtet e reja pra na kthejnë dhe një herë te organizimi klasik, duke e zbehur kësisoj mjetin e propagandës masive. Ky veprim në një  mënyrë ua kthen partive atë që e kanë në emrin e regjistrimit në gjykatë, por jo në përditshmërinë e punës së tyre: “politikën”.
Përdorimi vetëm i mediumeve për të komunikuar politikisht me shqiptarët e transformon politikën në një fetish, në një zgjedhje si mes Fantës dhe Koka-Kolës, duke e njëhsuar në një  mënyrë politikën me mallin, si para- kusht për të ekzistuar në kapitalizëm.
Kjo tërheqje nga varësia mediatike e një partie e cila pas më pak se një viti do jetë në pushtet është një shpresë për një reformim, siç po ndodh me subjektet politike, edhe në ato mediatike të cilat aq shumë e kanë privatizuar misionin e tyre publik, sa kanë humbur tërësisht në pyllin e errët të interesave aspak legjitime të pushtetarëve të sotëm. E si të tilla vërtet janë pushtet i katërt, por pas Ushtrisë, Policisë dhe SHISH-it,duke u bërë kështu vetëm një zgjatje e aparatit shtetëror të dhunës.
Kthimi në metodën klasike të organizimit është në të njejtën kohë dhe një hap i rëndësishëm drejt modernizimit. Sot partitë politike moderne nuk vegjetojnë nën trysnine historike të kohës, por i japin kohës dinamiken e ideve të tyre. Berisha e ka pësuar kohën jo vetëm në kontekstin biologjik,por mbi të gjitha në atë historik. Ai nuk ka as fuqinë e as dijen për t'i folur të ardhmes, për këtë arsye të vetmet referenca që zotëron janë ato të së shkuarës. I rrethuar nga servilë patologjikë në media e në grupin e tij parlamentar, ai e ka humbur tërësisht raportin me kohën dhe me popullin që duhet të drejtojë. Një plak moralizues që nuk propozon asgjë, tamam si ata që rrinë te pragu i derës e skërmojnë nën dhëmbë kundra rinisë që nuk e kanë më, e për këtë arsye e urrejnë.
PS duket që ka kuptuar momentin e saj historik, i cili nuk është vetëm të jetë një alternativë në letrën zgjedhore, por një zgjidhëse e situatës së rëndë krijuar këto vite të një berishizmi absolut, e çlirimit të energjisë popullore, përkundrejt humbjes totale të shpresës.
Muajt në vazhdim do jenë një testim shumë i rëndësishëm për partinë më të madhe në vend, për këtë përgjegjësi që ka marë para disa ditësh në prezantimin e strategjisë, e gjithashtu dhe për Edi Ramën, i cili ka marrë përsipër të bëjë të mundur këtë strategji në vetë të parë, si përmbyllje e aktit të fundit të kesaj drame politike të dekadave të fundit.