28 tetori, masa sigurie në Selanik për paradën ushtarake

Sot në ora 11:00, presidenti grek Karolos do të marrë pjesë në paradën ushtarake, që zhvillohet në Selanik me rastin e Ditës Kombëtare të 28 tetorit. 

Në Selanik ndodhet edhe Ministri i Mbrojtjes, Panos Panajotopulos, i cili do të shoqërojë Presidentin gjatë gjithë qëndrimit. 

Policia ka një plan veprimi për sot, me qëllim shmangien e ngjarjeve si ato të vitit të kaluar. Rreth 2000 policië janë në gatishmëri për të garantuar zhvillimin normal të paradës. Do të zhvillohen kontrolle të rrepta identiteti për të gjithë ata që përpiqen të arrijnë në tribunën e personaliteteve. Policët do të jenë rreshtuar përgjatë plazhit, për të forcuar praninë e tyre në vendet ku do të bëhen protesta dhe kanë urdhër për kontrolle dhe arrestime parandaluese të atyre që afrohen, ndërsa parashikohet edhe mbikëqyrje ajrore. Ndërkaq ushtria ka mohuar përfshirjen e saj në masat e sigurisë së paradës. 

Kujtojmë se një vit më parë, pikërisht më 28 tetor gjatë paradës ushtarake në Selanik, presidenti Karolos Papulias u sulmua verbalisht nga protestuesit, gjë që shkaktoi tension dhe anulimin e paradës. 

Sot shënohet 72 vjetori i fillimit të luftës italo-greke, ditë e cila në Greqi është një nga dy festat kombëtare. 

Çfarë përfaqëson 28 Tetori për Greqinë
Ndryshe nga vendet e tjera që festojnë dhe kanë vendosur si ditë pushimi ditët e përfundimit të dy luftërave botërore, Greqia ka vendosur si festë kombëtare futjen në Luftën e Dytë Botërore, dmth fillimin e luftës greko-italiane. Në Greqi, të gjithë përvjetorët e mëdhenj kombëtarë janë të lidhur me fillimin dhe jo me përfundimin e një lufte, dmth me pjekurinë e kombit për revoltë kundër skllavërisë turke (25 Mars) ose fashizmit (28 Tetor). 
Në orët e para të mëngjesit të 28 Tetorit të vitit 1940, qeveria e atëhershme italiane i dërgoi një ultimatum Greqisë, nëpërmjet ambasadorit italian në Athinë, Emanuele Grazzi, i cili ia dorëzoi personalisht kryeministrit grek, Ioanis Metaksas, në shtëpinë e tij, ku kërkonte kalimin e lirë të trupave italiane nga kufiri greko-shqiptar, që në vazhdim të pushtojë disa pika strategjike të Mbretërisë së Greqisë (porte, aeroporte, etj), për nevojat e furnizimit dhe për lehtësira të tjera, për avancimin në Afrikë. 
Pas leximit të tekstit, kryeministri grek ktheu shikimin e tij tek ambasadori italian dhe u përgjigj në gjuhën franceze (gjuha zyrtare diplomatike) me frazën historike: «Alors, c'est la guerre!», (Pra, kjo do të thotë luftë!), duke treguar kështu qëndrimin negativ mbi kërkesat italiane. 
Vetë Grazzi në kujtimet e tij, që u botuan në vitin 1945, përshkruan këtë skenë: “Kam urdhër z.kryeministër t’ju bëj një njoftim”, dhe i dhashë letrën. Unë pashë emocion në duart dhe në sytë e tij. Me një zë të qëndrueshëm dhe duke më parë në sy Metaksas më tha: “Kjo do të thotë luftë”. Iu përgjigja se kjo mund të shmanget. Mu përgjigj OXI! (JO!). U largova duke u përkulur me respektin më të thellë, para këtij plaku, i cili preferoi sakrificën, në vend të skllavërisë”. 
2 orë pas ngjarjes së mësipërme, filloi lufta greko-italiane me futjen e trupave pushtuese italiane, kështu Greqia për t’u mbrojtur u përfshi në luftë. 
Përvjetori i parë i «JO»-së u festua për herë të parë gjatë pushtimit. Në ndërtesën kryesore dhe në oborrin e Universitetit të Athinës u bë festimi i parë më 28 tetor të 1941. Ka pasur fjalime nga studentët dhe foli për përvjetorin, një ditë më parë, edhe Profesori Konstantinos Cacos, i cili refuzoi të bëjë mësim në ditën e përvjetorit, kështu u dëbua nga Universiteti. 

Anila Jole

Ballkanweb.com